Назарбаев Зияткерлік мектебінде жас ойшылдар арасында спорттық бағдарламалау бойынша жарыс ұйымдастырылды. Бұл сайыста оза шапқандар ел чемпионатына жолдама алады. Бәсекеге облыстың түкпір-түкпірінен 20 оқушы қатысты. Көп ұзамай жеңімпаз да белгілі болды. Ол – IT-мектеп-лицейінің оқушысы Данил Аксенов.
ДАНИЛ АКСЕНОВ, жарыс жеңімпазы:
– Жеңгеніме қуанып тұрмын. 6 тапсырма болды. Менде соның 5-еуін дұрыс орындадым. Аса қиын болды деп айта алмаймын. Өзіме оңай болған сияқты.
Ал, НЗМ оқушысы Фариза Шалабай – 3-ші орын иегері. Ол математика, информатика пәндеріне қызығады екен. Бір қызығы, жеткіншек сайыста орын аламын деп ойламаған.
ФАРИЗА ШАЛАБАЙ, жарысқа қатысушы:
– Бағдарламалауды информатика сабағында 8, 9-шы сыныптардан бері қолданамыз. Спорттық бағдарламалаумен осы жылы ғана айналыса бастадым. Үш есепті шығарғанда қобалжыған едім.
ДАНИЯР УӘЛИЕВ, химия-биология бағытындағы НЗМ директоры:
– Спорттық бағдарламалаумен айналысқан бала негізінде өзінің мамандығын IT саласында көреді. Жалпы, жарыс республикалық деңгейге іріктеу ретінде өтіп жатыр.
Жарыс жеңімпаздарына арнап “Freedom Holding Corparation” компаниясы 1 млн теңге бөлді. Қомақты қаржы үздіктер арасында бөлінді. Сонымен қатар, 2 солтүстікқазақстандық бағдарламашы Астана қаласында спорттық бағдарламалау бойынша өтетін әлем чемпионатына қатысу мүмкіндігіне ие болды.
Мәдина Қаби