Петропавл теміржол вокзалына жақындаған мына пойыз көпшілікті күттірді. Оның ішінде Аслан Асылбеков, Нұрсұлтан Жақыпов және Данияр Жарасов сынды ел мерейін асырған спортшылар келе жатыр.
Бұл жігіттер зор құрмет-қошеметке лайық. Олар жақында ғана сонау Үндістанда кикбоксингтен өткен халықаралық турнирде қарсылас шақ келтірмей, үшеуі де алтыннан алқа тағынды.
ДАНИЯР ЖАРАСОВ, кикбоксингтен халықаралық турнирдің жеңімпазы:
– 3 жекпе-жек өткізіп, барлығында жеңдім. Үндістандық 2 спортшыны нокаутпен ұттым. Ал финалда Ирак елінің өкілін ұпай сандары бойынша тізе бүктірдім. 2 жұмалық дайындақтан өттік. Жарыс жоғары деңгейде ұйымдастырылды.
Жуан жұдырықты жігіттер жағаны жайлауға жібермейді. Спортшылар әрмен қарай тер төкпек. Алда ірі додалар тұр.
ӘДІЛ НҰРЖАУЫПОВ, кикбоксингтен облыстың аға жаттықтырушысы:
– Дайындықты әрмен қарай жалғастырамыз. Петропавл қаласында “Солтүстік Кубогы” турнирі өтеді. Сол жарыста жеңіске жеткен жігіттер Астанада өтетін Азия Кубогына қатысады.
Қоса кетейік, Үндістанда өткен халықаралық турнир 500-ден астам спортшының басын қосты. Қатысушылардың ішінде түркиялық, өзбекстандық, ұлыбританиялық және жергілікті кіл мықтылар болды.
Байболат Құлтанов