Сәбит Мұқанов атындағы облыстық қазақ сазды-драма театрында Қожаберген Толыбайұлының 360 жылдығына орай “Дауылпаз баба – Қожаберген” қойылымы сахналанды. Спектакльде сол кездегі заман қасіреті ғана емес, Қожаберген жыраудың болмысы, ақындығы мен батырлығы, көсемдігі мен көрегенділігі, ұлтжандылығы оқиғалар желісі арқылы көрсетіледі. Сондай-ақ, орыс патшалығынан көмек сұраған сатқындардың сұрқия істері мен айласы да спектакль желісіне арқау етілген. Қожаберген жыраудың Тәуке ханның “Жеті жарғысын” дайындауға зор үлес қосқандығы да қойылымда үйлесімді көрініс тапқан.
Қойылымды тамашалауға келген көрерменнің қарасы қалың. Залда ине шаншар орын болған жоқ. Өнерсүйер қауымның ойын білдік.
– Бұл спектакльдің қуантатыны, ең біріншіден, қазақша болып жатқаны. Қаламызда білдей бір қазақ театрының ашылып жатқанына қуаныштымын.
– Үлкен, жақсы әсер аламын деп ойлаймын осы спектакльден. Жастарға рахмет осындай қойылым көрсетіп жатқандарына.
“Елім-ай” тарихи дастанының желісі бойынша көрерменге жол тартқан қойылым 2015 жылдан бері театр репертуарынан түспей келеді.
Ақжүніс Мұқатай