Күн қатты ыстық болмаса да Пестрое көлінің маңы бос емес. Тұрғындар балалары мен немерелерімен келіп шомылуда. Тіпті, өзге өңірден де келгендер бар. Құтқарушылар судың температурасы +10 градус дейді. Мұндай кезде мамандар адамдарға шомылуға кеңес бермейді. Суға түсу температура кемінде 18 градус болуы керек. Айта кетейік, шомылу маусымы басталғалы өңірде 1 адам қаза тапты.
ӘЛІБЕК БОРОМБАЕВ – СҚО ТЖД азаматтық қорғаныс бөлімінің аға офицері:
– Күнде рейдке шығып тұрамыз. Пестрое көлінің маңында 5 құтқарушы жұмыс істейді. Күндіз 3-еуі, түнде 2-еуі кезекшілік атқарады. Шомылу маусымы басталғалы 148 тұрғынға қатысты әкімшілік хаттама толтырылды. Ең бастысы, адамдарға айтарым, шомылу кезінде тиісті ережені бұлжытпай ұстану қажет.
Рейд барысында мамандар 100-ге жуық жаднама таратты. Онда суға түсу кезіндегі қауіпсіздік шаралары жазылған. Ережелер қарапайым, ең бастысы, осы қағидаларды ұстану қажет.
– Аяқтың сіңірі тартып қалса дүрбелеңге салынбау керек. Өз-өзін сабырлы ұстауға тырысу керек. Суда көп жүзуге болмайды.
– Немерелеріме ережені айтып отырамын. Судың арнайы белгіленген жерінен ары қарай өтіп кетпеу қажет.
Айта кетейік, өңірде суға түсуге арналған 60 орын бар.
Гульден Симбаева