Жаздың алғашқы шуақты күні. Бүгінігі мерекелік күннің атмосферасы ерекше. Нағыз ән мен жырдан шашу шашып, сайран салатын күн. Орталық алаңда «SUMMER DANCE» атты фестиваль ұйымдастырылды. Қатысушылардың жалпы саны 1500-ге жуықтайды.
САЯН ЕРМЕК, облыстық балалар мен жасөспірімдер шығармашылығы орталығының бөлім меңгерушісі:
Барша бүлдіршіндерімізді мерекемен құттықтаймын. Міне, бізде заманауи хореография өтіп жатыр. Неге біз заманауи хореография таңдадық? Себебі, қазіргі таңда жастардың көбісі осы би түріне қызығады. Қала тұрғындарына керемет көңіл-күй сыйлаймыз деген ойдамыз. Бұл шараға қала мен облысымыздың түкпір-түкпірінен келген шығармашылық ұжымдар қатысып отыр.
27 би ұжымының өнерпаздары бір алаңға жиналды. Заманауи бағыттағы билердің барлық түрі орындалды. Талантты жеткіншектердің бірі – Аида Боташ. Ол – “GALLA DANCE STUDIO” ұжымының жас бишісі. 5 жасынан бастап өнер әлеміне қадам басқан екен.
АИДА БОТАШ:
– Менің жасым 9-да. Қазір біз “Кім капитан болады?” деген би билейміз. Мен осыған дейін флешмобтарда билегенмін. Билеген күшті.
Алаңға жиналған ата-аналар мен балалардың қарасы қалың. Жадыраңқы көңіл-күймен саябақта серуендеп, фестивалді тамашалауда.
– Маған 1 маусым күні ұнап жатыр.
– Мереке құтты болсын.
– Бәрі ұнады. Концерт күшті өтіп жатыр.
Бишілер бір-бірінен өзіндік стильдерімен ерекшеленді. Жас дарындардың барлығы мақтау қағаздарымен марапатталды. Таланттарды бір алаңға жинайтын мұндай фестиваль алдағы уақытта да жалғасын табады.
Аснурия Абдула