Мектепте қауіпсіздікті қамтамасыз ету. Бұл мәселе полиция департаментінің басшылығы мен мемлекеттік орган өкілдері және жекеменшік күзет қызметкерлерінің кездесуінде талқыланды.
Өңірде 572 білім беру нысаны жұмыс істеп тұр. Оның 466-сы – мектеп.
Мекемелердің басым бөлігінде бейбақылау камераларын орнату, орталықтандырылған күзет қызметіне қосу және осындай өзге де мәселелер әлі толыққанды шешілген жоқ. Түйткілдің түбі – нысандардың көбінде мамандандырылған күзеттің жоқтығында.
РУСЛАН ДАНЬЯРОВ, СҚО ПД күзет қызметін бақылау бөлімінің бастығы:
– Осы ретте жиынға қатысып отырған жекеменшік күзет ұйымдарының басшыларына айтарым, мектепке егде жастағы азаматтарды қоймаңыздар. Балалардың қауіпсіздігін қамтамасыз етуде физикалық тұрғыда шыныққан, арнайы дайындалған мамандарға басымдық беру қажет.
Сондай-ақ, жиында жедел қызметтер арасындағы байланыс, терроризмге қарсы қорғаныс пен өрт қауіпсіздігі мәселелері талқыланды.