Мамлют ауданының тұрғыны басқарған «Nissan» маркалы машина полиция қызметкерлерінің “Тоқта” дегеніне қарамай зуылдап барады. Қашып құтылғысы келген жүргізуші Покровка ауылының тұсында ұсталды. Өзі өткен жылдың жазында 7 жылға көлік жүргізу құқығынан айырылыпты. Қасында 46 жастағы жолаушысы бар. Екеуі де ішімдік ішіп алған. Аталған факті ҚР Қылмыстық кодексінің 346-бабы бойынша сотқа дейінгі тергеп-тексерулердің бірыңғай тізіліміне енгізілді. Тәртіпке бағынбаған ер адамға айыппұл салынып қана қоймай, 5 жылға дейін бас бостандығынан айыру жазасы қолданылуы мүмкін. Сондай-ақ, өмір бойына көлік жүргізу құқығынан айырылуы ықтимал.
Дана Ешкенова