Облыстық балалар мен жасөспірімдер шығармашылығы орталығында болашақ журналистердің басын қосқан “Жас қаламгер” облыстық фестивалі өтті. Ортада Шал ақын ауданына қарасты Қаратал мен Кеңес ауылдарының оқушылары өздерінің жобаларын қорғауда. Олар – мектепішілік газеттің мүшелері. Қараталдық Меруерт Жеңісова 9-шы сыныпта оқиды. Ол үнемі өзінің білім ұясындағы жаңалықтарды жазып, қатарластары мен ұстаздарының назарына ұсынады екен.
МЕРУЕРТ ЖЕҢІСОВА, Қаратал орта мектебінің оқушысы, Шал ақын ауданы:
– “Жас қалам” қаламгерлер клубына мектептің бүкіл оқушысы қатысады деп айта аламын. Біз онда оқушыларымыздың шығармаларын жария етеміз. Бүгін өзіміздің газетіміздегі оқушыларымыздың жетістіктерін көресеттік.
“Жас қаламгер” облыстық фестиваліне 100-ге жуық жас қатысты. Олардың барлығы өздері шығарған газеттер мен бейнематериалдарын қазылар алқасына ұсынды. Қожаберген жырау атындағы 6-шы мектептің оқушысы Айжан Тастемірова Оқушылар сарайында журналистиканың қыр-сырын меңгеруде. Бірнеше жұмысы көрерменге жол тауып үлгеріпті.
АЙЖАН ТАСТЕМІРОВА, Қожаберген жырау атындағы №6 орта мектебінің оқушысы:
– Біз байқауға “URPAQ” бағдарламасын алып келдік. “URPAQ” бағдарламасы Қызылжар телеарнасынан көрсетіледі. Онда 4 айдар бар. Олар: “Digital URPAQ”, “Бізде қонақта”, “Біздің кейіпкер” және “Сіз білесіз бе?”. “Бізде қонақта” деген айдарымызда өңіріміздің белгілі тұлғаларынан сұхбат аламыз.
САЯН ЕРМЕК, облыстық балалар мен жасөспірімдер шығармашылығы орталығының бөлім меңгерушісі:
– Біз 2019-ға дейін жыл сайын “Жас қаламгер” фестивалін өткізген болатынбыз. Карантинге байланысты 2 жыл ұйымдастыра алмадық.
Шара соңында саланың жілігін шағып, майын ішкен азаматтар оқушыларға арнайы шеберлік сағатын өткізді. Сонымен қатар, жас журналистер Муниципиалдық телеарнада экскурсия жасады.