“Қарымды қаламгер, ғибратты ғалым”. Бүгін осындай атаумен Сәбит Мұқанов атындағы облыстық кітапханада профессор Зарқын Тайшыбайдың 80 жасқа толуына арналған іс-шара өтті.
Бүгінгі бас қосуға академиктің қаламы қарымды журналист шәкірттері мен әріптестері арнайы келіпті. Алдыменен сол құрметті қонақтарға сөз берілді. Көпшілік алдында Ақмарал Ыбыраева Зарқын Тайшыбайдың 80 жасқа дейін бағындырған белестері мен атқарған бірталай еңбегіне тоқталып өтті.
АҚМАРАЛ ЫБЫРАЕВА, Қозыбаев университетінің профессоры
- Лев Николаевич Гумилев Евразия Ұлттық университетінде қызмет етіп жүрген кезімде 2013 жылы “Халық тарих толқынында” деген бағдарлама шықты. Сол бағдарламаның аясында 7 томдық ғылыми жинақ шығардық. Мақалаларды жинақтап шығып, 7 томдық шығарған кезде осы СҚО-дан Зарқын Тайшыбайдың мақалалары көп кездесті. 2015 жылы осы жаққа жұмысқа орналасқан кезде ең бірінші іздеп тапқан адамым осы Зарқын Тайшыбай болды.
Залда қарымды қаламгер мен ғибратты ғалымның жас, яғни журналистикаға енді бет бұрған ізбасарлары да отыр. Қазіргі таңда профессордан дәріс тыңдап жүргендердің бірі – Айнұр Досан.
АЙНҰР ДОСАН, Қозыбаев университетінің студенті
- Алғаш университетке келген кезде журналистика бойынша түсінік болмаған еді. Білгеніміз бір тоғыз, білмейтініміз тоқсан тоғыз болды. Осы сала бойынша атамыз көп нәрсені үйретті, әлі де үйретіп келеді. Жалпы, үлкен өмірге қадам бастыртып, журналистика саласына бет бұрғызып, қызығушылығымызды арттырды. Сабақта атамыз өте мейірімді, әрине қатал болатын кездері де болады. Дегенмен сол қаталдығы бізге көп нәрсені үйретуде.
Зарқын Тайшыбай сексеннің сеңгірінен астым деп тоқтап қалмақ емес. Академик зерттеу жүргізіп, тың жаңалық ашуды жалғастыра бермек.
Алдияр Айтпаев