Жаңа облыстар жөнінде шешім бір жарым ай ішінде қабылданады. Бұл туралы Әділет министрі Қанат Мусин мәлімдеді.
Еске салай кетейік, наурыздың 16-сы күні ел Президенті Қасым-Жомарт Тоқаев халыққа арнаған Жолдауында Семей қаласын орталығы етіп Абай облысын құруды ұсынған болатын. Сондай-ақ, Жезқазған төңірегінде Ұлытау облысын құру туралы айтты. Оның орталығы Жезқазған қаласы болады деп болжанып отыр.
Ал Алматы облысы екіге бөлінуі тиіс: Жетісу деп аталатын бөлігінің орталығы – Талдықорған, Алматы облысының орталығы қылып Қапшағай қаласын бекіту керек делінді.
Қанат Мусин, ҚР Әділет министрі:
– Менің білуімше, облыстардың бюджетін бөлу және шекараны анықтау жұмыстары жүргізіліп жатыр. Жақында ғана ШҚО-ның шекарасы шамамен қалай бөлінетіні туралы ақпарат БАҚ-та жарияланды. Әзірге, жаңалық жоқ, жұмыс жүргізіліп жатыр. Жаңа облыстар бойынша Үкіметтің экономикалық блогы айналысып жатыр. Менің ойымша, алдағы бір жарым айда шешім қабылданады.
Данаш Хамзина