Қала орталығындағы көшелердің бірінде бүлдіршіндер жолдан өтіп бара жатыр. Олардың қасында тәртіп сақшылары бар. Полицейлер ұл-қыздарға көшеде қауіпсіз қозғалу ережелерін түсіндіруде. Мамандар ұқтырған сабақты балақайлар жақсылап жаттап алған секілді. 6 жастағы Диана Мәлікова есімді қыз жолда жүру ережесін балабақшада да оқыпты. Бірақ, тәртіп сақшыларының үйреткені мүлдем басқаша екен әрі өте қызықты дейді.
Диана Мәлікова:
– Жолдың үстінен жасыл түс жанған кезде және үлкен кісілермен бірге өту қажет. Мен әуелі жан-жаққа қарап аламын. Көліктің жоқтығына көз жеткізу керек. Содан соң ғана өтемін.
Жазғы уақытта кішкентай ұл-қыздар көшеде көп жүреді. Ата-аналар өз балаларына жолда жүру ережелерін дұрыстап түсіндіргендері жөн дейді полицейлер.
Баян Байғаскина – СҚО ПД ЖПҚБ аға инспекторы:
– Жаз мезглі басталысымен балалар арасында жарақат алу саны артады. Бүгін біз оларға жолда жүру мен велосипедті қалай дұрыс қолдану керектігін түсіндірдік. Сондай-ақ, көлік жүргізушілеріне жылдамдық ережесін сақтауды ескертеміз.
Акция әлі жалғасын табады. Полицейлер келесі кездесуді велосипед тізгіндегендермен өткіземіз дейді. Жалпы, жыл басынан бері өңірде балалардың қатысуымен 12 жол-көлік оқиғасы болған.
Бердимурат Баймухан