200 теңгелік монета айналымға шықты

МТРА жаңалықтары

22:08 28 Қаңтар 2020

Ұлттық банк бүгін жаңа 200 теңгелік монеталарды жаппай айналымға шығарды. Оның дизайны өзге тиыннан алысқа кетпеген, дегенмен көлемі үлкендеу. Қағаз 200-дік тез ескіреді, ал монетаның ғұмыры ұзақ. Өзгерістерді мамандар осылай түсіндіріп отыр.

Саят Ермек – тілші:

– Ерте ме, кеш пе, көзіміз үйренген бұл банкнота айналымнан толықтай шығады. Оның орнын, халықтың тілімен айтқанда, күміс 200-дік баспақ. Қазақстанның Теңге сарайы оны жасап шығарды, ал Ұлттық банк бүгін, яғни қаңтардың 28-і айналымға енгізді. Жаңа монета қандай екен? Қазір көреміз!

Көз салдық, ұстап көрдік. Алғашқы ой – кескіні жүз теңгелікке келеді ме, қалай? Бірақ, айырмашылықтар көп, өте көп.

Мейрам Мамбетов – “ҚР Ұлттық банкі” РММ СҚФ бөлім басшысы:

– Сыртқы сақинасы нейзИльберден жасалған. Бұл – мыс, никель мен мырыштың қоспасы. Ал ішкі дискісі – никельді жезден құйылған. Қырында 16 ойық бар. Артқы жағында – Елтаңба мен “Қазақстан Республикасы” деген жазу және монетаның соғылған жылы, ал бет жағында номиналы белгіленген.

Қазақы ою-өрнек пен көлеңкелі көлденең жолақтар да көзге ілігеді. Жаңа екі жүз теңгелік – көлемі ең үлкен монета. Диаметрі – 26 мм. Бұл жүз теңгеліктің ауқымынан 1 жарым мм-ге көп, салыстыра беріңіз. Салмағы да ауырлау енді – 7,5 грамм. Яғни, осындай 5-6 монетаны салсаңыз, әмиян ауырлайды.

Саят Ермек – тілші:

– 200 теңгені қағаздан монетаға алмастырудың қандай қажеті бар деген заңды сауал туындайды. Түсіндіреміз! Мысал қарапайым – автобуста жолақыны жиі 200 теңгелікпен төлеп жатамыз, дүкеннен нан не басқа да ұсақ-түйек алғанда да көбіне 200 теңгемен есеп айырысамыз, яки бұл банкнота басқаларына қарағанда айналымда жиірек, салдарынан 1-1,5 жылдың ішінде ескіріп, жыртылып жатады. Ал монета 15-20 жыл қалтқысыз қызмет етеді.

Жаңа шақа айналымға шыққанымен, әлі таралып үлгерген жоқ. Бұған сәл уақыт керек. Сондықтан, көпшілік оны әлі көрмеді. Біз суретін ұсындық, пікір сұрадық. Сонымен, жұрт не дейді?

– Очень красивая монета, чем-то на 100 тенге похожа, только цвета наоборот.
– Сыртқы келбетіне қарасақ, әдемі болып көрінеді, 100 теңгелік сияқты. Жай қағаздан жасағанша, монета дұрыс деп ойлаймын.
– Дизайны әдемі, сөз жоқ. Бірақ, қағаз 200-дікті терминалға жиі салушы едім, енді қалай болады? Ал негізі 200 теңгелік тез ескіріп, шүберектей болып қалады, ал металдың аты металл.

Айту міндет: 200 теңгелік банкноттар баяғыша төлем құралы болып қала бермек. Олар бірте-бірте тозығы жетіп, жарамыз болып қалғанда ғана айналымнан шығады.

Саят Ермек

Бұдан әрі оқыңыз

Бескөл ауылында зарарсыздандыру жұмыстары жүргізілуде
Қала көшелерінде зарарсыздандыру жұмыстары жүргізілуде
Сабыр түбі – сары алтын
Жергілікті деңгейдегі карантинге қатысты қаулыға өзгерістер енгізілді
Әскери міндеттілер арнайы жиынға шақыртылады
Су тасқынына дайындық жүргізілуде
“Радуга” ЖШС антисептик өндірісін бір жолға қойды
Әлеуметтік төлем кімге және қалай беріледі?
Отбасыларға азық-түлік жиынтығы табысталады
Бескөлде күзде 5 қабатты үй қолданысқа тапсырылады
Мемлекеттік қызмет істері агенттігі жергілікті өкілдерінің кезекті рейді
Айыртау ауданына жас әкім келді