Солтүстікқазақстандық оқушы жуырда «Артек» лагерінде өткен «Біздің батырлар» атты халықаралық байқауға қатысып қайтты. Сайыста ТМД елдерінен жиылған 12 мыңға жуық жас өздері жазған жобаларын қорғаған.
Мирас Бариев ЛОРД мектеп-лицейінің 7-ші сыныбында оқиды. Жасөспірім -сыныптастарының алды, оқуда озат. Талапты жеткіншек қолы босай қалса бірден кітапханаға асығады.
Мирас Бариев Қырымдағы «Артек» лагерінде өткен «Біздің батырлар» атты халықаралық байқауға қатысып келіпті. Қарашаның 4-і күні ұйымдастырылған сайыста ТМД елдерінен келген 12 мыңнан астам жас бақ сынасқан. 7-ші мен 10-шы сынып аралығындағы оқушылар өздері жазған жобаларын қорғапты. Мирас ҰОС ардагері жерлесіміз Пётр Гладковтың өмірі мен ерлігі жайлы баяндаған. Осылайша, еңбегі қазылар алқасы тарапынан жоғары бағаланып, жеңімпаз атаныпты.
Мирас Бариев – Дарынды балаларға мамандандырылған ЛОРД мектеп-лицейінің оқушысы:
– Біздің ата-бабаларымыз ҰОС-ына қатысып жерімізді жаулардан қорғап қалды. Олар сыйлап кеткен бейбіт күнді сақтау – біздің қасиетті парызымыз. Ұрпақтың болашағы үшін жанын аямаған жандарды көзі тірісінде құрметке бөлеуіміз керек.
Халықаралық байқауға Мирастан бөлек ЛОРД мектеп-лицейінің тағы бір оқушысы барған екен. Алайда, ғылыми жетекшілері Сәуле Мырзабаеваның сөзінше, ол іріктеу кезеңінен өте алмапты.
Сәуле Мырзабаева – Дарынды балаларға мамандандырылған ЛОРД мектеп-лицейінің орыс тілі және әдебиеті пәні мұғалімі:
– Байқаудың бірінші кезеңінде 12 мың адамның тек 34-і ғана іріктелініп алынды. Елімізден барған оқушылардан тек Мирас келесі кезеңге өте алды. Оның жобасы көпшіліктің көңілінен шықты. Соңында қатысушылардың 3-уіне бас жүлде берілді.
Мирас Бариев болашақта жазған жобасын дамытқысы келеді. Ол Пётр Гладковтың өмірі және ерлігімен толық танысқаннан кейін жерлесіміз туралы кітап жазып көрмек.
Маржан Касымбек