Көктемгі дала жұмыстарын жүргізу үшін солтүстікқазақстандық диқандарға 58 мың тоннадан астам дизель отыны керек. Бұл қажеттілік толығымен жабылады. Қазір жеңілдетілген жанар-жағармайды теріскейліктерге жеткізу ісімен “Эталон Регион” серіктестігі белсенді айналысып жатыр. Соңғы деректерге сүйенсек, аймақтағы іскер азаматтар аталған оператордан 10 мың тонна сұйықтық алып үлгеріпті. Шалғайдағы шаруаларды бұрын алаңдатқан жайт – дизель отынын құю бекеттерінің алыстығы. Мәселе шешімін табуда. Ағымдағы жылы жауапты кәсіпорын бірнеше тасымалдау көлігін сатып алған.
МӘДЕН ЖҰМАҒҰЛОВ, “Эталон Регион” ЖШС директоры:
— Биыл егін егу жұмыстарына арналған дизель отынының құны литріне 281 теңге деп белгіленді. Алайда, біз бұдан да төмен бағамен сатудамыз. Егер агроқұрылымдар көп көлемдегі жанар-жағармайға тапсырыс берсе, 275-278 теңгенің аралығында саудалаймыз. Бұл диқандарға қосымша жеңілдік деп білемін. Жауапты науқан қарсаңында техникалық паркіміз сұйықтық тасымалдайтын 20 көлік сатып алды. Бұлар өтінім берген азаматтарға қажетті отынды жеткізіп береді.