Жергілікті футболшылар тағы да жерге қаратты! Петропавлдық “Қызылжар” ел біріншілігінің кезекті туры аясында жеңіліс тапты. Бұл жолы теріскейліктер өскемендік “Алтайға” “тіс батыра” алмады. “Қарасай” стадионында өткен матч 1 де 2 есебімен аяқталды. Кездесудегі голдар ойынның соңына таман соғылды. Есепті 84-ші минутта қонақтар ашты. Араға 8 минут салып, солтүстікқазақстандықтар таразы басын теңестірді. Дегенмен, қуаныш көпке созылмады. Допты ойынға қосқан алтайлықтар бірден алға ұмтылып, жеңісті жұлып алды. Бұл – “Қызылжардың” қатарынан 4-ші жеңілісі. Қазір петропавлдық ұжым турнирлік кестеде 11-ші орында тұр. Ендігі матч мамырдың 23-і күні сырт алаңда “Ақтөбеге” қарсы өтеді.