Петропавлдағы оқушылар сарайында кәсіби бағдар беру бойынша “PROFuture Forum” форумы өтті. Шарапаты мол шараға Петропавлдағы 500-ден астам 9-шы және 11-ші сынып оқушылары қатысты. Форумға 20-дан астам колледж өкілдері де келген. Олар оқушыларға өздері ұсынатын білім бағдарламасын таныстырып, қандай мамандықтар бойынша оқытатынын жіпке тізді.
АЙНАГҮЛ СҰРАҒАНОВА, СҚО білім басқармасының басшысы:
—Мұндағы ең басты мақсат – дұрыс мамандық таңдау. Себебі, өңірімізде сапалы жұмысшыларды даярлау қажет. Соның ішінде аграрлық секторға, құрылыс саласына әрі білім беру, медицина саласына маман дайындау қажет.
Бүгінгі іс-шараға келіп отырған жандардың қатарында 11-сынып оқушысы Аруна Төлеген де бар. Айтуынша, бүгінгі форумнан ол өзі үшін мол мағұлмат алған.
АРУНА ТӨЛЕГЕН, оқушы:
— Бүгінгі іс-шара мен үшін өте пайдалы болды. Себебі, өз болашағымды саналы түрде жоспарлап, өзіме ұнайтын мамандықты таңдағым келеді.
Айта кетейік, аталмыш іс-шара облыстық білім басқармасының қолдауымен жүзеге асып отыр. “PROFuture Forum” алдағы уақытта да өзінің жалғасын табады.
Ұлан Ыдырыс