Су тасқыны жайлы соңғы мәліметпен бөліссек. “Қазгидромет” өкілдерінің хабарлауынша, Сергеев су қоймасындағы су деңгейі 871 сантиметрді құрап отыр. Бұл өткен тәулікпен салыстырғанда 3 сантиметрге төмен. Ернеуден асқан тіршілік көзінің биіктігі – 81 см. Ал Петропавл гидроторабындағы су деңгейі керісінше көтеріліп келеді.
“Соңғы тәулік ішінде Петропавл гидроторабындағы су деңгейі 7 сантиметрге артқан. Шаһар арқылы тасқынның алғашқы толқыны толығымен өтпеді. Осы аптада Петропавл маңында максималды көрсеткіш тіркеледі. Қызылжар ауданына қарасты Новоникольское маңында тіршілік көзінің деңгейі 8 см-ге көтерілді. Бұл облыстағы ең үлкен өсім болып табылады”, – деп хабарлады “Қазгидромет” РМК СҚОФ.
Солтүстік Қазақстан облысында алдағы күндері күн суытып, жаңбыр жаууы мүмкін. Тұман болуы ықтимал. Синоптиктердің мәліметінше, екінші онкүндіктің ортасында ауа температурасы +2-7 градусқа жетсе, түнде -8 градусқа дейін төмендейді.Екінші онкүндік желді болады. Желдің жылдамдығы секундына 15-20 метрге дейін жетеді. Жауын-шашын көптеу болып көрінуі мүмкін. Бірақ, нормадан аспайды. Үшінші онкүндікте күн күрт жылиды. Күндіз ауа температурасы +20 градусқа дейін барады, – деп хабарлады “Қазгидромет” РМК СҚОФ.
Нұрасыл Ахмет