Қазақстандықтардың банк алдындағы қарызы жыл басынан бері 12 жарым пайызға немесе 44,3 млрд теңгеге өсті. Бұл туралы LS ақпараттық агенттігі Ұлттық банкке сілтеме жасай отырып хабарлады. Биылғы 1-ші шілдедегі жағдай бойынша банкке кешіктірілген берешек көлемі 399,1 млрд теңгені құрады. Соның 166 млрд теңгеден астамы – алматылықтарға, 34-32 млрд теңге шамасындағы қарыз шымкенттіктер мен астаналықтарға тиесілі. Ал Түркістан, Павлодар мен Абай облыстарының тұрғындарының екінші деңгейлі қаржы ұйымдарына берешегі жалпы алғанда 3 млрд-тан басталып 5 млрд теңгеден асады.