“Қызылжар” кезекті ойында жеңіске жетті! Бұл жолы петропавлдық ұжым футболдан бастау алған ел біріншілігінің екінші туры аясында Атакенттің “Мақтаарал” командасын тізе бүктірді. Павлодарда өткен матчтағы жалғыз голды 26-шы минутта Максим Чиканчи соқты. Айып алаңына асырылған допты баспен ұрған шабуылшы қарсыластың қос қорғаушысы мен қақпашысын қапы қалдырды. Әзірге, солтүстікқазақстандық команда – чемпионаттағы гол жібермеген жалғыз клуб. 2 жеңістен кейін турнирлік кестеде 5-ші сатыда тұр. Ендігі қарсылас – көкшетаулық “Оқжетпес”. Солтүстіктің дербиі саналатын кездесу наурыздың 15-і күні Астанада өтеді.
Байболат Култанов