Үкімет отырысында министрлер мен әкімдердің халықпен өткізген кездесулері қорытындыланды. Өткен жылы ведомство басшылары 216 жеке қабылдау өткізген. Нәтижесінде ағайынды алаңдатқан 1,5 жарымнан астам сұрақ талқыланып, 74%-ы шешімін тапқан. Бұл жайлы Ақпарат және қоғамдық даму министрі Дархан Қыдырәлі хабарлады. Ұлттық экономика министрі Әлібек Қуантыровтың айтуынша әкімдер 2022-де азаматтармен 20 мыңға жуық кездесу өткізген. Жүздесулерде тұрғын үй-коммуналдық инфрақұрылым, абаттандыру және экология, жолдарды реконструкциялау, әлеуметтік инфрақұрылым объектілерін салу бойынша 33 мыңнан астам ұсыныс мен мәселелер көтерілген. Жиында Премьер-министр Әлихан Смайылов жоспарланған кездесулерден жалтарып, түрлі сылтау айтқан атқамінерлерді сынға алды.
ӘЛИХАН СМАЙЫЛОВ, ҚР Премьер-министрі:
«Бұл жерде қандай да бір сылтау айту орынсыз. Ешқандай себеп қабылданбайды. Барлық кездесулер өткізілуі тиіс. Оған вице-министрлерді де тарту қажет. Бұл азаматтарды көбірек қабылдауға мүмкіндік береді. Бізге ашық және нақты байланыс қажет. Халық үніне құлақ асатын мемлекет үшін мұндай іс-шаралар халықпен қарым-қатынастың маңызды құралына айналуы тиіс».
Алдияр Айтпаев