Шырын Темербаева әл-Фараби мектеп-лицейінде оқиды.
Ізденімпаз жас бүгінгі жобалар сайысына өз жаңалығын әкелді.
10-шы сыныпта оқитын бұрымды бидай сығындысынан шырын жасап, сұлыдан печенье пісірген. Өз қолымен әзірлеген тағамдардың ерекшелігі – әрі дәруменге толы, әрі адамды арықтатады. 2 ай көлемінде ізденген жобасын Шырын қазір қазылар алқасының алдында қорғайды.
ШЫРЫН ТЕМЕРБАЕВА, әл-Фараби мектеп-лицейінің оқушысы
– Бұдан адам өзінің керек емес салмағын тастай алады. Көптеген аурулардан айыға алады. Жобамның ең басты мақсаты – осы витграсс сығындысын сатылымға шығару. Бұл – бидайдан жасалынған тәттілер. Бұл жобаның өзектілігі – бұл Қазақстанда дамымаған. Ал шетелде өте жақсы дамыған. Бұл бидайдың аты – витграсс, кәдімгі ұн жасайтын.
Мәриәм Сейітжанова “Дарын” мектеп-лицейінде оқиды.
Оқушы бір тілім мақтаға дән сіңіріп, одан өсімдік өсіріп шығарған.
МӘРИӘМ СЕЙІТЖАНОВА, “Дарын” мектеп-лицейінің оқушысы
– Бұл жобаға құрбым екеуіміз біраз уақыт жұмсадық.
Біраз іздендік. Мұғалімдердің көмегіне жүгіндік. Дәнді үй жағдайында қалай өсіру керектігін көрсеткіміз келді.
Бұл – облыстық кезеңнің бірінші деңгейі. Жалпы айта кетсек, конкурс 9 бен 11-ші сынып оқушылары арасында өтіп жатыр. Жиын 100-ден аса баланың басын біріктірді. Жас өнертапқыштардың туындылары тамсануға тұрарлық. Пәндер бойынша өтіп жатқан зерттеу жобаларының келесі кезеңі желтоқсан айының 14-ші жұлдызында бастау алады.
ҚУАНЫШ БЕЛГІБАЙ, білім саласындағы әдістемелік жұмыс және ақпараттық технологиялар орталығы директорының орынбасары:
– Балалардың жұмыстары антиплагиат жүйесі арқылы тексерілді. Әр бала белгілі бір пән бойынша өз жобаларын алып келді. Барлығы – 19 пән. Әр бала өзі таңдаған пәні бойынша қатысуда.
Облыстық кезеңнен сүрінбей өткен оқушылар республикалық кезеңге қатысады. Оның қашан және қайда өтетіні белгісіз.
Гульден Симбаева