Аққайыңдар өлкесінде орақ науқаны қарқын алды. Ауыл шаруашылығы және жер қатынастары басқармасы өкілдері ұсынған дерекке сүйенсек, солтүстікқазақстандық диқандар қазір қолайлы ауа райын пайдаланып, күн-түн демей еңбек етіп жатыр. Бүгінгі күнге 2,1 млн гектардағы дәнді және дәнді-бұршақты дақылдар жиналыпты. Бұл көрсеткіш аталған өнімдерге бөлінген жалпы жердің 69 пайызына жуықтайды. Орташа шығымдылық 12,7 центнерді құрайды. Ал майлы дақылдарға қарастырылған аумақтың 17,1 пайызында маңызды жұмыс тәмамдалған. Мұндағы берекелік – 7 центнер. Қамбағы енді құйылған астыққа әлі баға бекітілмепті. Мамандардың сөзінше, тауардың биылғы құны қыркүйектің 15-інен кейін жария етілмек.
Байболат Култанов