Қоғам

Қиялы ауылдық округіне жаңа әкім сайланды

Қиялы ауылдық округінде сайлау өтті. Кеше аталған аумаққа жаңа әкім сайланды. Ел тізгінін ұстайтын жанды таңдау үшін елді мекенде таңғы сағат 6-дан барлығы 4 учаске өз жұмысын бастады. Соның бірі Қиялы ауылының орта мектебінде орналасқан. Мұнда №106 сайлау пункті жұмыс істеді.

ЕЛЕНА МАМЫЧЕВА, №106 сайлау учаскесі сайлау комиссиясының төрайымы, Аққайың ауданы:
– Біздің №106 сайлау учаскесінде 769 сайлаушы бар. Пункт таңғы сағат 6-да ашылды. 10:30-дағы жағдай бойынша тізімдегі жандардың 30% өз дауыстарын берді. Ауыл тұрғындары саяси науқанға белсенді қатысуда. Учаске кешкі 8-де жабылады.

Өз таңдауын жасау үшін 106-сы сайлау учаскесіне Вячеслав Сустретов келді. Азамат ауылда 51 жылдан бері тұрады. Елдің жағдайымен жақсы таныс. “Өзгеріс қажет”, – дейді.

ВЯЧЕСЛАВ СУСТРЕТОВ, Қиялы ауылының тұрғыны, Аққайың ауданы:
– Біріншіден жолдарымыз жөнделсе екен. Жаңа әкім келісімен көшелерді жарықтандыру да қолға алынса дейміз. Округке кім басшылық етсе де ел игілігі үшін жұмысын адал атқарса болғаны.

Қиялыда 107-ші сайлау учаскесі де жұмыс істеді. Таңғы сағат 11:30-дағы жағдай бойынша мұнда 187 адам келіп өз таңдауын жасаған. Бұл – барлық сайлаушылардың шамамен 40 пайызы.

– Жаңа әкім біздің сұрақтарымыз бен мәселелерді дұрыстап шешіп, халқымыз бен ауылымызға адал еңбек етеді деген сенімдеміз.
– Ауылымыздағы өзекті мәселелердің бірі жолмен байланысты. Ауылішілік және ауданаралық жолдардың жағдайы көңілге қаяу салады.
– Округке халықты назарсыз қалдырмайтын жақсы әкім керек.

Бұл сайлауға барлығы 1300-ден астам жан қатысуға тиіс еді. Бірақ, әкімді тағайындауда елді мекен тұрғындарының 1100-і белсенділік танытқан. Қалғаны шарадан қалыс қалған екен. Жалпы, саяси науқанда 3 кандидат ұсынылыпты. Оның екеуі округке басшы болуға өздігінен ниет білдіріпті. Ал үшіншісі – осы Қиялы ауылының тұрғыны. Азамат “AMANAT” партиясынан үміткер болып, саяси науқанда ең көп дауыс жинады. Енді Қиялы ауылдық округіне Евгений Гоц жетекшілік етеді.

Алдияр Айтпаев