Абайлаңыз, балалар! Өңірде осындай атаумен кезекті жедел-профилактикалық іс-шара өтіп жатыр. Оның аясында тәртіп сақшылары балалармен және ата-аналармен кездесіп, жолда жүру ережелерін түсіндіруде.
РАМИЛЬ ХАБИБУЛЛИН – №23 орта мектебінің оқушысы
– Велосипедпен жүру кезінде тепе-теңдікті сақтау керек. Сондай-ақ, жаяу жүргінші жолағынан өту кезінде тоқтап, велосипедті итеріп өту қажет. Маған мұны атам, әжем, анам және полиция қызметкерлері айтты.
Тәртіп сақшылары “Абайлаңыз, балалар!” атты акцияны бекерден-бекер ұйымдастырып отырған жоқ. Ағымдағы жылы облыс аумағында 184 жол көлік оқиғасы тіркеліпті. Салдарынан 24 адам қаза тапқан және 277 адам жарақат алған.
АЙГҮЛ КӘРІМОВА – СҚО ПД Жергілікті полиция қызметі басқармасының инспекторы
– Ата-аналар, оқу жылының басталуы қарсаңында балаларыңызға жолдардағы тәртіп-талаптарды түсіндіріңіздер.
“Абайлаңыз, балалар!” іс-шарасының 2 күндік қорытындысы мәлім. Қос тәулік ішінде жол қозғалысы ережесін бұзған 412 тұлға анықталыпты.
Оның 35-і – адамдардың жолды белгіленбеген жерден кесіп өтуі, бағдаршамның қызыл түсін елемеуі. Республикалық алдын алу акциясының
бірінші кезеңі 31-ші тамызда аяқталады. Екінші кезең 1-ші қыркүйектен бастау алады.
Гульден Симбаева