Әлемде мукополисахаридоз дейтін сирек кездесетін дерт бар. Бұл – генетикалық ауру. Қазақстанда аталған дертке 82 бала шалдыққан. Өңірде бұндай ауру тіркелмеген. Медицина ғылымдарының докторы Майра Шәріпова аталған ауруды ерте анықтай алу қажет дейді. Уақытында тағайындалған ем баланың жағдайын жеңілдетеді.
МАЙРА ШӘРІПОВА, педиатрия және балалар хирургиясы ғылыми орталығының бас гастроэнтерологы, Алматы қаласы:
– Дәрігерлердің көбісі бұл ауруды диагностикалауды білмейді, яғни, ерте анықтау бойынша тәжірибелері жоқ. Науқас балаға неғұрлым ертерек диагноз қойсақ, терапия соғұрлым тиімді болады.
Қандай да бір патологияның барын тәжірибелі дәрігерлер баланың 6 айында анықтайды. Емді сол кезден бастайды. Мамандардың айтуынша, мукополисахаридозға шалдыққан бала ринит пен отитпен жиі ауырады екен. Бұл жағдайда қабыну асқынулармен бірге жүреді. Сыртқы белгілері де болады.
МАЙРА ШӘРІПОВА, педиатрия және балалар хирургиясы ғылыми орталығының бас гастроэнтерологы, Алматы қаласы:
– Дертке шалдыққан баланың бет-әлпеті өзгеріске ұшырайды. Қасы, ерні қалыңдай түседі. Тілінің көлемі ұлғаяды. Бір жылдан кейін сүйегі өзгере бастайды.
Мамандардың айтуынша, жаман дертті бірнеше симптом бойынша анықтауға болады. Абдумәлік Тойшыйев оқыту семинарына Аққайың ауданынан келіп отыр. Жас маман мұндай кездесулер, әсіресе, терапевттер үшін маңызды деп санайды.
АБДУМӘЛІК ТОЙШЫЙЕВ, жалпы тәжірибелі дәрігер, Аққайың ауданы:
– Жас маман болғаннан кейін бір нәрсені білсек, бірін енді ұмытып қаласың. Көп нәрсені қалыс қалдырмау үшін осындай шараларға жиі қатысып тұрамыз. Бас дәрігерлер де өздері жіберіп отырады. Бүгінгі осы шарада жас маман болғаннан кейін көптеген клиникалық белгілерін білмей, қолдан жіберіп алуымыз мүмкін. Сондай жағдайлар болмау үшін көптеген жолдарды үйретті деп айтуға болады.
Оқыту семинары бір күндік. Шамамен 2 сағатқа жалғасқан дәрісті жергілікті 30-ға жуық ақхалатты тыңдады. Дені – жас мамандар.
Самал Жунусова