Ашуын аялдамадан алу жайттары Петропавлда жиілеп барады. Тіпті, әдетке айналды десе болады. Заманауи деп орнатылған дүниелердің жәй да сау тамтығы қалған жоқ. Ызаға булыққан – ғашық жігіт. Екі жас өзара келіспей қалған көрінеді. 28 жастағы “боксшы” жігіттің әйнек сындырғанын біреу телефонға түсіріп алған.
Аталған факті бойынша Қазақстан Республикасы Әкімшілік құқықбұзушылықтар туралы кодексінің 434-бабы – «Ұсақ бұзақылық» бойынша әкімшілік материал жиналды.
Қанат Жұмабаев – қалалық ПБ бірінші полиция бөлімінің бөлімше бастығы
– Аумақтың маңындағы куәгерлер сұрастырылды, бейнекамералар тексерілді. Соның нәтижесінде қаланың тұрғыны анықталды. Осы тұрғынға қатысты Әкімшілік кодекстің 434-бабы бойынша материал жиналып, әкімшілік сотқа жіберілетін болады.
Ойланбай опық жеген жігіт 5 АЕК көлемінде айыппұл төлеуі мүмкін немесе 10 күнге дейін қамауға алынуы ықтимал әрі келтірген шығынның орнын толтырады. Сондай-ақ, тәртіп сақшылары М.Жұмабаев көшесіндегі аялдама павильон сындырған ер адамды да іздестіріп жатыр.