Кезек спортшыларға да келді. Бүгін референдумды қолдау штабының өкілдері салауатты өмір салтын ұстанған жандармен кездесті.
“AMANAT” партиясы жанынан құрылған штаб мүшесі Владимир Витченко жастарға саяси іс-шараның маңыздылығын айтып, елімізде орын алғалы тұрған ауқымды өзгерістерді жіпке тізді.
ВЛАДИМИР ВИТЧЕНКО, “AMANAT” партиясы жанынан құрылған референдумды қолдау жөніндегі штаб мүшесі
– Бұған дейін өз елімізді әлемге танытумен айналыстық. Бұл мақсатымыз орындалды. Енді ішкі әл-ауқатты арттыру бойынша жұмыстар жүргізілмек. Референдум бұған арқау болмақ. Сол үшін де референдумға белсенді ат салысу қажет.
Бүгінгі жиынға облыстық олимпиада резервінің мамандандырылған мектеп-интернат-колледжінің жастары мен оқытушылары қатысып отыр. Көпшілік арасынан Данияр Өтегенов штаб мүшелеріне сұрақ қойып, саяси іс-шараға қатысты қызығушылығын білдірді.
ДАНИЯР ӨТЕГЕНОВ, облыстық ОРММИК оқытушысы
-Қатысатын болдық. Мамандар бәрін жақсы түсіндірді. Өзімнің ойым – барып референдумды қолдау қажет. Бұған спортшылар да, облыс құрамалары да белсенді түрде қатысады деп ойлаймын. Жаңа Қазақстан деп бекерден-бекер айтылып жатқан жоқ. Бұған мен сенімдімін. Қазақстанымыз жақсы жаққа ілгерілейді.
Бүгінде облыстық референдумды қолдау штабына 20 қоғам белсендісі мүшелік етеді. Олар күнделікті осындай 10-ға тарта жүздесу ұйымдастырады. Айта кету қажет, Петропавлда маусымның 5-і күні 80-нен астам сайлау учаскесі жұмыс істейді.
Алдияр Айтпаев