Маска тағып, “ASHYQ” қосымшасын сканерлеу. Бұл – “DOSTYQ MАLL” сауда ойын-сауық орталығының кіреберісіндегі басты қағида. Яғни, мұнда әрбір келуші осы қарапайым ережені ескеруі тиіс. Тұрғындар талаптар толық орындалса ғана нысан ішіне кіре алады.
– Қоғамық орындарда маска тағып, қолымызды антисептикпен тазалап отырамыз. Әрине, өз денсаулығымыз үшін осындай қауіпсіздік ережелерін сақтаймыз. Мекемелерге “ASHYQ” қосымшасы арқылы кіреміз.
– Отбасымның барлығы вакцина алған. Сақтық шараларына асқан мұқияттылықпен қараймыз. Өзіміздің және басқа жандардың денсаулығына қауіп төндіргіміз келмейді.
– Антисептик, маска тағу. Бұл өз денсаулығымызды сақтау шараларына жатады.
Сауда-ойын-сауық орталығында негізгі санитарлық талаптар аудиохабарлама ретінде жиі жарияланып тұрады. Нысанның 3-ші қабатында екпе егу қосыны да жұмыс істеп тұр. Дәрігерлердің сөзінше, мұнда күн сайын адамдар вакцина алады. Мәселен, қазір 5 азамат “Спутник-V”-дің екінші құрамын салдыртуда.
Кирилл Успенский, қалалық №1 емхананың фельдшері:
-Екпе алуға келген жан ең алдымен келісім құжатын толтырады. Кейін, салдыртқысы келетін вакцинаны таңдайды. Қазіргі таңда бізде “Спутник-V”, “Vero Cell”, “Qaz Vac” препараттары бар. Келуші иммундалған соң 30 минут бойы біздің бақылауымызда болады.
Қазіргі таңда сауда-ойын-сауық орталығына вакцина алу үшін келетін жандардың қатары сиреген. Орташа есеппен күніне қосынға 12 адам келіп, иммундаудан өтеді екен. Айта кету қажет, екпе егу пункті күндізгі 11-ден кешкі 7-ге дейін жұмыс істейді.
Алдияр Айтпаев