Новомихайловка ауылдық округінде 2269 адам тұрады. Ауылдардағы ағайынмен инспектор Ерзат Шәрішев тығыз қарым-қатынаста. Ол өзінің негізгі міндетінен бөлек, елді мекендердегі зейнеткерлер, студенттер және оқушылармен жиі кездеседі. Арнайы тізімдегі жандармен де тілдесіп тұрады.
Ерзат Шәрішев, Мамлют аудандық полиция бөлімінің учаскелік инспекторы:
– Қыстыгүні жалғыз тұратын адамдар мен алкогольге құмар жандармен көп жұмыс жасаймын. Олардың үйіне жиі барып, жағдайларын біліп тұрамыз. Сондай-ақ, жауапты учаскеде 20-дан астам бейнебақылау камерасы орнатылған. Мен онда кез-келген уақытта кіріп, әкімшілік учаскеде не болып жатқанын көре аламын.
Ауыл тұрғындары аса белсенді. Олар полицейге жәрдемдесіп тұрады. Мысалы, жоғалған адамдарды, малдарды табуға көмектеседі. Ерзан Шәрішевтің сөзінше, бұл – үлкен қолдау.
– Тәртіп сақшысы ауылда тұрады. Ауылда тұрғанын өзіміз қаладық. Учаскелік инспектор халыққа жақын болса, қылмыстық ахуал да айтарлықтай түзеледі.
– Инспектор жұмысына жауапты. Қандай да бір мәселе туындап жатса, әрқайсымызға көмектеседі.
Жалпы, қазіргі күні Солтүстік Қазақстан облысында 200-ден аса учаскелік полицей қызмет атқарады. Өткен жылы олар 2 мыңға жуық қылмыстың бетін ашқан және 60 мыңнан аса әкімшілік құқықбұзушылық фактісін анықтап, кінәлі жандарды жауапкершілікке тартқан.
Бердимурат Баймухан