Облыстық көпбейінді балалар ауруханасындағы эпидемиологиялық ахуал қалыпқа келуде. Мұндағы коронавирусқа шалдыққан науқастарға арналған стационарда қазір 18 адам ем алып жатыр. Олардың барлығының жағдайы тұрақты деп бағалануда. Аптасына инфекциялық бөлімшеге ковид-19 диагнозымен 5-6 жеткіншектен түседі екен. Абырой болғанда, дені дерттің жеңіл формасымен күреседі. Ахуалды одан әрі жақсарту үшін ұжымдық иммунитетті қалыптастыру қажет дейді ақ халаттылар. Қазір елімізде 12 жастан асқан ұл-қыздарға, жүкті әйелдер мен бала емізетін нәзік жандыларға екпе қою науқаны жалғасуда.
Сергей Завьялов, облыстық көпбейінді балалар ауруханасының эпидемиолог-дәрігері:
– Солтүстікқазақстандықтарды вакциналаудан өтуге шақырамын. Бүгінде әлем елдерінің тәжірибесіне қарасақ, иммундау шарасының маңыздылығын түсінеміз. Екпе алу арқылы ғана ұжымдың иммунитетті қалыптастырып, індетке төтеп бере аламыз.
Бердимурат Баймухан