Петропавлда жыл басынан бері кәмелетке толмаған 12 бала заңның ала жібін аттаған. Үшеуі бұған дейін де ювеналдық полиция есебінде тұрған. Араларындағы 16 жастағы жасөсіпірімнің 6 бірдей дүкен ұрлығына қатыстылығы дәлелденіп отыр. Бұзақы балалар арнайы білім беру мекемелеріне жіберілген. Жалпы, 10 айдың ішінде өңірде жасөспірімдердің қылмыстық әрекетке баруының алдын алу мақсатында 120-дан астам рейдтік шара ұйымдастырылған. Нәтижесінде түнгі уақытта балаларының қыдыруына жол берген, ұл-қыздары спирттік ішімдік ішкен және тәрбиеге көңіл бөлмеген 800-ге жуық ата-ана жауапкершілікке тартылған. Сондай-ақ, түнгі уақытта кәмелетке толмағандарды көңіл көтеру орындарына кіргізген 15 ойын-сауық мекемесінің иесіне айыппұл салынған.
Дана Ешкенова