Еріктілер жалғызілікті қарияға көмек көрсетті

Балалар

23:45 20 Қазан 2021

Еңкіш тартқан ескі үйде Алина Бардасова жалғыз тұрады. Жұбайы 11 жыл бұрын марқұм болған. Күндегі жалғыз сырласы – көршілері. Әлеуметтік қызметкер де келіп тұрады екен. Ол да кейуананың мұңын тыңдап, қолғабыс етеді. 72 жастағы зейнеткердің үй шаруасын атқаруға қауқары шамалы. Арасында еріктілерге арқа сүйейді.

Алина Бардасова, қала тұрғыны:

Аяқ-қолым сау болған кезде бәрін өзім істейтінмін. Қазір жүре алмай қалдым. Үйдің алды күл-қоқысқа толып тұр. Бау-бақшаны жапырақтан тазалайтын. Жастарды шақырып, көмек көрсетуін сұрадым. Осылай қыста да ауламды қардан тазалап беріп отырса нұр үстіне нұр.

Белсенді жастар білек сыбана іске кірісіп кетті. Ауланы жинастырды, бау-бақшаны тазалады. 10-ға жуық волонтердің ұйымшылдығы мақтарлықтай.
Қатарға жаңадан қосылғандары бар. Жергілікті кәсіптік-педагогикалық колледжінің 1-ші курс студенті Бақыт Сейілбекова қоғам қарияларға қамқорлықпен қарауы қажет дейді.

Бақыт Сейілбекова, волонтер:

Мен адамдарға мейірімділікпен қараймын. Сол үшін әрдайым адамдарға көмектескім келіп тұрады. Біздің көмегіміз қарияларға өте маңызды деп ойлаймын.

Еріктілер қалалық жастар ресурстық орталығына мүшелік етеді. Мұнда барлығы 200-ге жуық волонтер бар. Жастар жұмыс талғамайды, ешкімді бөліп-жармайды. Бір аптаның ішінде 3-4 үйге барып қолғабыс етеді. Қарияларға қамқорлық білдіреді, мүмкіндігі шектеулі жандарға жәрдемдеседі, көпбалалы аналарды да назардан тыс қалдырмайды.

Аян Зариф, қалалық жастар ресурстық орталығының нұсқаушысы:

Қалалық жастар ресурстық орталығы қазіргі таңда әр апта сайын “мекен-жай көмегін” жасап тұрады. Яғни, қарт адамдардың үйлеріне барып есік алдындағы жұмыстарды жасап береді. Орталықтың өз базасы бар. Сол база арқылы жалғызбасты зейнеткерлеге кезек-кезекпен көмек көрсетеміз.

Жыл басынан бері қалалық жастар ресурстық орталығының өкілдері 500-ге жуық адамға көмек көрсеткен.

Дана Ешкенова

Бұдан әрі оқыңыз

«Абылай хан резиденциясы» музей кешенінде квест ойыны ұйымдастырылды
Әскерге шақырту науқаны жүріп жатыр
Күзгі әскерге шақыру басталды
Балалар кинологтардың жұмысымен танысты
Облыстық көпбейінді балалар ауруханасы 14 жас маманмен толықты
6637 әскери бөлімінде ашық есік күні өтті
Қозыбаев университетінде психологиялық клуб ашылды