Мемлекет басшысының тапсырмасына сәйкес, елімізде 2025 жылға дейін мың мектеп бой көтереді. Жоспар бойынша Қазақстанда биылдың өзінде 200 жаңа оқу ошағы қолданысқа тапсырылуы тиіс. Елдегі мектептерде орын саны тапшы, 3 ауысымда жұмыс істейтін білім ұяларының саны жылдан жылға артуда. Мұндай мәселе әсіресе, Нұр-Сұлтан, Алматы, Шымкент қалалары мен Алматы және Түркістан облыстарында өзекті тұр. Статистикаға сүйенсек, аталған шаһарлар мен аймақтарда балалар аралас форматта оқып жатыр. Оқушылардың 86,4 пайызы штаттық режимде білім алса, қалғаны ата-аналарының өтініштері негізінде қашықтықтан оқуда. Білім және ғылым бірінші вице-министрі Шолпан Каринованың сөзінше, мектептерде тиісті санитарлық талаптар қатаң сақталған.
Шолпан Каринова, ҚР білім және ғылым бірінші вице-министрі:
– Барлық мектептерге ұстаздар мен оқушылар «Ashyq» қосымшасы арқылы кіреді. Әр пән бойынша оқу бағдарламалары орындалуда. Сонымен қатар, биылғы жылғы басты мәселе – пандемия кезінде орын алған оқу процестеріндегі олқылықтарды жою. Бүгінгі күні әр педагог өз пәні негізінде нақты олқылықтарды ескеріп, оқу процесін қалыпты жүргізіп келе жатыр.
Эльмира Садвокасова