Петропавлда “Қалпына келтіру емі және медициналық оңалту” орталығы ашылды

Денсаулық сақтау

22:06 6 Қазан 2021

Бұрын бұл нысанның 2-ші қабатында педиатр бөлімшесі болған. Яғни, мұнда қант диабеті мен жүрек ауруына шалдыққан балалар емделіпті. Қазіргі күні аталған емдеу орны 5-ші қабатқа ауыстырылып, оның орнында «Қалпына келтіру емі және медициналық оңалту» бөлімшесі пайда болды.

Ольга Киселева, облыстық көпбейінді балалар ауруханасы қалпына келтіру емі және медициналық оңалту бөлімшесінің меңгерушісі:

– Мына баланың жамбас сүйектері сынған. Біз оны аспалы жүйе арқылы жүруге үйретіп жатырмыз. Заман игілігі қалыпқа келу процесін жеделдетеді. Осылайша, балалар ақсамай, жылдам аяққа тұрып кетеді.

Су жаңа орталыққа ата-аналар 18 жасқа дейінгі балаларын әкеліп емдете алады. Ұл-қыздар үшін барлық жағдай жасалған. Мұнда аяқ-қол қимылын жетілдіруге арналған тренажерлер, швед қабырғалары, ұсақ моторика мен тепе-теңдікті дамытуға қажетті қондырғылар бар. Сондай-ақ, логопедтің көмегіне де жүгінуге болады.

Мария Паничева, облыстық көпбейінді балалар ауруханасы қалпына келтіру емі және медициналық оңалту бөлімшесінің логопеді:

– Бұл кабинетке балалар демалу үшін келеді. Сондай-ақ, олардың сөйлеу қабілетін дамыту бойынша жаттығулар жасалады. Одан бөлек, тұтығып сөйлейтін ұл-қыздарды осы жерде емдейміз.

Татьяна Кожевникованың 2 ұлы бар. Үлкені 9 айлығында инсультқа шалдыққан екен. Балақай жыл сайын күрделі оңалту шарасынан өтіп тұруы қажет. Бұрын оны анасы жүздеген шақырымды еңсеріп, елордаға апарып жүріпті. Айтуынша, бұған біраз қаржы мен күш-қуат кетеді. Енді аталған көмекті алысқа бармай-ақ облыс орталығыда тегін алмақ.

Татьяна Кожевникова, Соколовка ауылының тұрғыны, Қызылжар ауданы:

– Жаңа орталық ашылып біраз машақат артта қалды. Мамандардың бәрі білікті. Бізге қажетті көмекті толық көрсетті. Қазір баламның денсаулығы жақсарып келеді. 13 күн жатырмыз. Ертең үйге қайтатын шығармыз.

Жоба «Samruk-Kazyna Trust» әлеуметтік жобаларды дамыту қорының қолдауымен жүзеге асты. Аталған ұйым орталықты жөндеп, қондырғы орнату үшін 80 млн теңгеден астам қаржы бөлген.

Асқар Сақыпкереев, СҚО әкімінің орынбасары:

– Берілген ақшаға 49 медициналық қондырғы алдық. Бұрын облысымызда 2 мың бала оңалтудан өтсе, енді бұл көрсеткіш тағы 500-ге артты.

Жалпы, аталған орталықта жыл сайын 600-ге жуық бала толық систематикалық оңалту шарасынан өтетін болады. Қазіргі күні мұнда 18 ұл-қыз ем қабылдап жатыр. Айта кеткен жөн, медициналық көмектің барлығы тегін көрсетіледі.

Бердимурат Баймухан

Бұдан әрі оқыңыз

Өңірде соңғы 2 айда 158 адам коронавирустан көз жұмды
Өңірде эпидахуал тұрақсыз
МӘМС аясында стоматологиялық қызмет кімдерге тегін көрсетіледі?
213 мыңнан астам солтүстіқазақстандық толық вакциналанған
Өңірде эпидахуал ушығып барады
СҚО-да бір күнде 71 адам коронавирус жұқтырды
СҚО-да соңғы тәулікте 100-ге жуық адам коронавирус жұқтырып алды
Өңірде тұмауға қарсы вакциналау жүріп жатыр
Өңірде спорттық диспансер ашылуы мүмкін
М.Жұмабаев ауданында 11 мыңға жуық адам вакцинаның толық курсын алған
СҚО қайтадан “қазыл” аймаққа өтті
Өңірде карантин жеңілдетіледі