Ботаникалық бақта пленэр өтті

Қоғам

22:11 20 Қыркүйек 2021

Ботаникалық бақтың ішінде жасанды көлшік бар. Мұнда бірқазан, дала үйрегі сияқты құстардың бірнеше түрі мекен етеді. Судың жағасында жатқан қанаттыларды Дәния есімді жас суретші қағаз бетіне түсіруде. Жеткіншекке осылай табиғат аясында таза ауамен тыныстап сурет салған ерекше ұнайды екен.

Дәния Мергалимова, Бейнелеу өнері мектебінің оқушысы:

– Ботаникалық баққа алғаш келіп тұрмын. Өзіме бұл жер қатты ұнады. Өсімдіктер, жануарлар мен құстардың түрі-түрі бар. Бақтың атмосферасы ерекше шабыт береді.

Тимур Баязитов Ботаникалық бақтың жолында жатқан саябақты қағаз бетіне түсіруде. Жас қылқалам шебері бұл жерді бекерден-бекер таңдамапты. Ол шағын саябақтан сәулет элементтері мен әсем табиғаттың ерекше үйлесімділігін байқаған екен. Сурет салуға берілгені соншалық, тіпті, себелеп тұрған жаңбырға алаңдайтын емес.

Тимур Баязитов, Бейнелеу өнері мектебінің оқушысы:

– Өзім көп нәрсеге қызығамын. Бақтың ішінде де біраз нәрсені байқадым. Сондықтан, бүгін бірнеше туындыға жан бітеді дер едім. Мен үшін табиғат – ең керемет суретші. Оны шеберліктің қандай шыңына шықсаң да дәлме-дәл суреттеу мүмкін емес.

Ботаникалық бақта суретшілердің қатысуымен пленэр жыл сайын ұйымдастырылады. Бұл іс-шара жуырда өмірден озған Равиль Рязаповты еске алуға арналып отыр. Көпшілікке жақсы мәлім, облыстың Құрметті агрономы ұзақ жылдар бойы баққа жетекшілік етті, оның дамуына сүбелі үлесін қосты.

Артур Рязапов, Ботаникалық бақтың директоры:

– Равиль Хасанович бұл жерге 12 жасында келді. Бақты көркейту үшін өзінің 50 жылдан астам өмірін сарп етті. Түрлі қиындықтарды бастан өткерді. Оранжереяны 90-шы жылдары жарық пен жылу болмаған кезде де сақтай білді. Бүгінде ботаникалық бақта өсімдіктің 2 мыңнан астам түрі бар.

Жалпы, пленэрге өнер мектебі мен «ЮНЕСКО» клубының 40-қа жуық оқушысы қатысты. Іс-шара қорытындысы бойынша кейбір суретшілердің жұмысы ботаникалық бақта сақталып қалмақ.

Алдияр Айтпаев

Бұдан әрі оқыңыз

Сыбайлас жемқорлыққа қатысы бар 4 адам «Nur Otan» партиясынан шығарылған
Нысандардың мүгедектер үшін қолжетімділігін арттыру қажет
Бескөлде қарттар арасында жарыс өтті
Әр солтүстікқазақстандық айына 76 мың 300 теңге жұмсайды
Өлкетанушы Вера Яворская өмірден озды
Техникалық оңалту құралдарына онлайн тапсырыс беруге болады
Петропавлда «Business Lady Qazaqstan» байқауы өтті
Өңірдің жаңа бас имамы тағайындалды
Петропавлдағы әйелдер колониясында көгалдандыру орталығы ашылды
СҚО-да «Ashyq» жобасы арқылы ереже бұзған 66 тұрғынға айыппұл салынған
Теріскейге қоныс аударушыларға арналған ақпараттық-кеңес орталығы құрылды
Жамбыл ауданында Алаш қозғалысына арналған халықаралық конференция өтеді