Жедел құтқару сайысы. 4 маман нысанның 4-ші қабатына сатымен көтеріледі. Нұрбол Жүкенов қарсыластырынан озып шығып, тапсырманы небәрі 16 секундтың ішінде орындады. Бұл – өңір бойынша жоғары көрсеткіш.
Нұрбол Жүкенов, қалалық №1 мамандандырылған өрт сөндіру бөлімінің өрт сөндірушісі:
– Колледж бітірген соң өрт сөндіру бөлімінде қызмет етіп жүрмін. Спорт – денсаулық кепілі. Жұмысқа физикалық тұрғыдан дайын болу керек.
Биылғы жарысқа Солтүстік Қазақстан кәсіптік-педогогикалық колледжінің 4-ші курс шәкірттері де қатысуда. Студенттер оңай шағылар жаңғақ емес екен. 5-ші топтың құрамында жүгірген Расул Мұхамедиев мамандардың өзін шаң қақтырып кетті. Осылайша, мәреге бірінші болып жетті.
Расул Мұхаммедиев, СҚ кәсіптік-педагогикалық колледжінің студенті:
– Бұл менің алғашқы жарысым емес. Бұған дейін дәл осы спорт түрінен жасөспірімдер арасында өткен ел біріншілігінде сайысқа түстім. 1-ші орын иеленіп, өңір намысын абыроймен қорғап қайттым. Бүгін де үздік нәтиже көрсетемін деп сенемін.
Дүбірлі сайысқа жалпы 80-нен астам адам қатысып жатыр. Құрамалардың саны – 18.
Серік Шақабаев, СҚО ТЖД бөлім бастығы:
– Осыдан кейін «Жастар» стадионында эстафета болады. Шал ақын, Тайынша, Қызылжар, Жамбыл – жалпы өңірдегі барлық 13 ауданның мамандары келді.
Ертең жарыстың қорытындысы шығарылып, үздіктер марапатталады.
Маржан Касымбек