“Үздік көпбалалы отбасы-2021” байқауы қорытындыланды

Қоғам

22:22 13 Қыркүйек 2021

Данияр Қарыпов пен жары Жанардың бір-бірін сүйіп қосылғандарына биыл 9 жыл екен. Бүгінде ерлі-зайыптылар – 3 қыз бен 1 ұлдың ата-анасы. Үлкен қыздары биыл 2-ші сыныпқа барған, ал кенжелерін 4 ай бұрын ғана бауырларына басқан. Отағасы Данияр – жеке кәсіпкер. Құрылыстың түр-түрімен айналысады екен. Жары Жанар үйдің түтінін түтетіп, берекесін келтіріп, балаларын тәрбиелеуде. Көпбалалы жанұяның өзіндік бала тәрбиесіндегі ұстанымдары бар.

Данияр Қарыпов, байқауға қатысушы, Шал ақын ауданы:

– Біз бала-шағамызға әділміз. Айтқан сөздерімізде тұрамыз. Өзіміздің отбасылық келісім шарттарымыз бар. Ең бастысы балаларымызды Қазақстанның ұлықты ұлдары, қылықты қыздары болатындай дәрежеге жеткізгіміз келеді.

Қарыповтар жанұясы Отбасы күні қарсаңында осындай байқау өтетіні жайлы әлуметтік желілерден көріп, қатысуға ниет білдірген. Сайыстың барлық талаптарын орындаған жанұя өзгелерден ерекшеленіп, 1-ші орынды жеңіп алды.
Ал екінші орын Тимирязев ауданында тұратын Қаболовтар отбасына бұйырды. Бүгінде Қанатжан мен Самал 2 ұл мен 2 қызды тәрбиелеуде. Жанұя мүшелері – жан-жақты өнерлі жандар.

Самал Қаболова, байқауға қатысушы, Тимирязев ауданы:

– Біз әрдайым бір-бірімізге қамқорлық танытып, бір-бірімізді демеп, қолдап жүреміз. Отбасымыз өте ұйымшыл. Жалпы, менің Қаболовтар әулетіне келін болып келгеніме биыл – 14 жыл. Жолдасымның анасымен бірге тұрамыз. Өз анамдай болып кеткен жанға алғысым шексіз. Сол адамның арқасында сыйластық пен татулықта өмір сүріп жатырмыз.

Ал Тимирязев ауданынан келген Мұхамединовтер жанұясы мен петропавлдық Жәнібековтер отбасы үздік үштікті қорытындылады. Жалпы, “Үздік көпбалалы отбасы-2021” байқауына облыс бойынша 7 жанұя қатысқан.

Антон Шишканов, “JE SKO штабы” ҚБ төрағасы:

– Отбасылық байқау қыркүйектің 1-і мен 8-і аралығында ұйымдастырылды. Конкурс онлайн форматта өтті. Ең алдымен қатысушылар тіркелді. Кейін отбасылық бейнеролик түсіріп, жанұя мүшелерін жақынырақ таныстырды. Сондай-ақ, отбасылық құндылықтар қалай дәріптеледі, жанұяда қандай салт-дәстүрлер барын баяндады.

“Үздік көпбалалы отбасы” байқауының бірде-бір қатысушысы назарсыз қалған жоқ. Барлығына ақшалай және естелік сыйлықтар табысталды.

Дана Ешкенова

Бұдан әрі оқыңыз

ХҚКО-лар бес күндік жұмыс кестесіне көшті
Петропавлдық оқушылар “Тәуелсіз Қазақстан” атты ашық сабаққа қатысты
СҚО-да келер жылы көкөніс тапшылығы бола ма?
Достық үйінде Жолдау талқыланды
Халық санағының екінші кезеңі бастау алды
Өңірде жол-көлік оқиғасы салдарынан 2 бала көз жұмған
Өңірдегі заңсыз қоқыс алаңдары ғарыштан анықталуда
Қария пәтеріне қоқыс тасып, тарақан қаптатып жіберген
Тәуелсіз Қазақстан: жасампаздыққа толы жылдар
Петропавлда екі жеңіл көлік соқтығысып қалды
Аналар күні қарсаңында облыс орталығында мерекелік іс-шара өтті
Жастардың пікірі тыңдалып, көзқарасы ескеріледі