Дүниежүзілік денсаулық сақтау ұйымының хабарлауынша, әлем тәж вирусын жұқтырудың шарықтау шегінен өтті. Дей тұрғанмен, бұл жағаны жайлауға жіберуге болады дегенді білдірмейді. Бүгінде вирус әр апта сайын 4,5 млн-ға жуық адамға жұғып жатыр екен. Ал, өлім-жітім көрсеткіші 68 мыңға жеткен. Елдегі эпидахуал жайлы баяндайық. Соңғы тәулікте республикамызда 3600-ден астам жаңа жағдай тіркелген. Індетке шалдыққандардың 79-ы – солтүстікқазақстандықтар.
Елде сауыққан жандардың саны ауырғандардан көп екені мәлім болып отыр. Бір күнде 6 900-ге жуық науқас дертті жеңген. Бірақ, қазір әлі 87 мың адам ем қабылдауда. Оның 18 мыңы медициналық көмекке зәру. Стационарлардағы науқастардың мыңнан астамы – ауыр халде, 378-і – аса ауыр жағдайда, 200-ге жуығы өкпені жасанды желдету аппаратына қосылған. “Жасыл” аймақта – Түркістан облысы ғана. “Сарыда” – Шығыс Қазақстан, Жамбыл, Қызылорда және Солтүстік Қазақстан өңірлері. 8-ші қыркүйектегі мәліметтер бойынша, коронавирусқа қарсы вакцинаның 1 компонентін 7 млн-ға жуық адам алса, 5 млн 755 мың қазақстандық иммундаудың толық курсынан өткен.
Байболат Култанов