Зейнетке шыққалы жатқан қала тұрғыны шағын трактор сатып алмақшы болады. OLХ сайтын ақтарып, бағасы арзандауын іздеген. 650 мың теңгенікін тауып, сатушысымен байланысыпты. Бәзбіреу: «Техниканы басқа қаладан алып кету керек»,-деп ер адамнан алдын ала жол төлемдеріне 150 мың теңге жіберуін сұраған. Петропавлдық бұл сөзге иланып, дереу несие рәсімдеп, тиісті соманы жіберіпті. Дегенмен, алаяқтар мұнымен тоқтамаған.
Интернет-алаяқтар: «3-4 күн күтіңіз, көлік кетті»,-деп сендірген. Алайда, трактор да, ақша да жоқ. Содан алданғанын түсінген тұрғын полицейлерге жүгінген. Нәтижесінде аталған факті ҚР Қылмыстық кодексінің 190-бабы 2-бөлігі – «Алаяқтық» бойынша сотқа дейінгі тергеп-тексерудің бірыңғай тізіліміне енгізілді.
Қазіргі күні тәртіп сақшылары жедел-іздестіру іс-шараларын жүргізуде. Осы орайда мамандар киберқылмыскерлердің OLХ сайтында жиі кездесетінін ескертеді. Жыл басынан бері тіркелген 335 интернет-алаяқтықтың 103-і дәл осы қосымшада орын алған.
Сәбит Бағытов, СҚО ПД криминалдық полиция басқармасының жедел уәкілі :
– Интернет-алаяқтардың құрығына түсіп қалмау үшін жеке мәліметтеріңіз бен PIN-кодтарыңызды, банк карталарының кодтарын, шоттарыңыздың нөмірлерін ешкімге айтпаңыздар. Сондай-ақ, сайттағы хабарландыруды егжей-тегжейлі тексеріп алған дұрыс. Ең бастысы – алдын ала төлем жасамау керек. Егер біреу хабарласып, өздерін банк қызметкері ретінде таныстырса – жеке ақпаратты мүлдем айтпаған жөн.
Полицейлердің айтуынша, алаяқтардың құрығына көбінесе нәзікжандылар түсіп жатады. Облыста мұндай 200-ден астам факті тіркелген.
Алтынай Казиканова