Бүгін облыстық кітапханада «Business Woman KZ» қоғамдық бірлестігі жергілікті филиалының өкілдері форум ұйымдастырды. Жиынға облыс әкімінің орынбасары Ғани Нығыметов қатысты.
Іс-шарада кәсіпкер әйелдер бизнес-жобаларды жүргізу тәжірибесімен бөлісіп, саладағы қиындықтар мен жетістіктер туралы әңгімеледі. Жалпы, «Business Woman KZ» – еліміздегі нәзікжандылардың кәсіпкерлігін қолдайтын және дамытатын ең ірі ұйым. Қоғамдық бірлестік түрлі бастамаларды жүзеге асырады. Соның бірі – “BUSINESS LADY KAZAKHSTAN” республикалық байқауы. 4 жыл ішінде конкурсқа 200-ге тарта қыз-келіншек қатысқан. Шара аясында шеберлік сағаттары мен тренингтер өткізілген. Бүгінде аталған ұйымға біздің өңірден 15 бизнесвумен мүшелік етеді. Соның ішінде Ризагүл Ысқақова да бар. Нәзікжандынің киім-кешек сатумен айналысып жүргеніне 10 жылдан астам уақыт өткен.
Ризагүл Ысқақова – «Business Woman KZ» ҚБ СҚОФ директорының орынбасары:
– Іс-шараның мақсаты – өзімізді жетілдіріп, облыстағы бизнес деңгейін арттыру. Және бір-бірімізге қолдау көрсетіп, кеңес береміз. Өзім жеке кәсіппен айналысамын. Нұр-Сұлтан мен Петропавлда киім дүкендерім бар.
Дана Ешкенова