Өңірдегі құқық қорғау жүйесінің жұмыс бағыттарының бірі “жұртқа жақын полиция” қағидасына негізделген. Бұл бастама 2019 жылдан қолға алынуда. Қазір облыс орталығында модуль үлгісіндегі 2 стационарлық бекет жұмыс істеп тұр. Бірі – қаланың қақ ортасында, екіншісі шет ауданда орналасқан. Осындай бір нысанның өзіне күніне 2-3 адамнан келіп, тәртіп сақшыларына өз бұйымтайларын жеткізеді. Стационарлық бекеттің жұмыс істеу тиімділігін бағамдаған Ішкі істер министрі Ерлан Тұрғымбаев Петропавл қаласында осындай тағы 4 бекет орнату қажеттігін айтты. Сондай-ақ, аулалар мен саябақтарда жаяу патрульдеуді күшейтуді тапсырды. Мектептердің аумағы да назардан тыс қалмауы тиіс.
Елдің бас полицейі жедел басқару орталығында, кинологиялық қызмет орталығында және кавалерия бөлімшесінде де болды. Сондай-ақ, азаматтарды жеке қабылдау өткізді. Солтүстікқазақстандықтар Ерлан Тұрғымбаевқа қоғамдық қауіпсіздік мәселелері жөнінде жүгінді. Министр жеке құраммен де кездесті. Солтүстік Қазақстан облысы Ресейдің 3 өңірімен шектеседі. Қос ел арасында келіп-кетушілер көп. Сол себепті, полицейлер қонақтарға да көмек көрсету және түсіндіру жұмыстарын сапалы жүргізулері қажет.
Ерлан Тұрғымбаев – ҚР Ішкі істер министрі:
– Бұл ретте жұмысты сервистік үлгіде іске асыруға тиіссіздер. Полиция қызметкері адамдардың құқықтарын қорғайды, қоғамдық тәртіпті қамтамасыз етеді, қылмыстарды ашады. Тағы бір міндетіміз – түсіндіру жұмыстарын жүргізу.
Министр заңсыз көші-қонмен, интернет-алаяқтықпен, мал ұрлығымен және синтетикалық есірткі бизнесімен күресті күшейтуді тапсырды. Аталған қылмыс түрлері трансшекаралық сипатқа ие. Сол себепті, шетелдік әріптестермен тығыз байланыста болу қажет деді министр.
Маржан Касымбек