Өңірде республикалық “Заңсыз сақталған атыс қаруын сату” акциясы аяқталды. Солтүстікқазақстандықтар кезекті шара барысында қолданыссыз жатқан және тауып алған мылтық пен тапаншаларын мамандарға тапсырып, ақшалай сыйақыға ие болды.
Акция 1 аптаға созылды. Осы уақыт ішінде ведомствоға 23 дана қару тапсырылған. Оның 16-сы – тегіс ұңғылы, 5-еуі – травматикалық, 2-еуі – ойық ұсақ калибрлі қару. Қазіргі таңда бұл дүниелер қылмыс кезінде қолданылмағандығын растайтын қажетті сараптамалардан өткізіліп жатыр. Шараның шартына сәйкес, қарудың қылмысқа қатыстылығы анықталмаса, онда бұрынғы иелері мылтық-тапаншаларының қайдан келгені жайлы айтуға міндеттелмейді. Дегенмен, бұл жөнінде тұрғындар толық түсініктеме берген көрінеді. Айтуларынша, басым бөлігі қаруды орманнан, Есіл өзенінен, ескі қора-қопсыны бұзған кезде тауып алған көрінеді.
Дана Ешкенова