Жалпы білім беретін пәндер бойынша республикалық олимпиаданың соңғы кезеңі өтуде. Білгірлер сайысында қазақстандық жоғары сынып оқушылары бақ сынап жатыр. Додада біздің аймақтың намысын 70-тен астам бала қорғауда. Жеңімпаз атанған ұл-қыздар халықаралық байқауға жолдама алмақ.
Республикалық байқау онлайн форматта өтіп жатыр. Оған қатысушылардың бірі – Әбу Досмұхамбетов атындағы облыстық дарынды балаларға мамандандырылған гимназия-интернатының 11-ші сынып оқушысы Сабина Тастемір. Ол облыстық кезеңде 2-ші орын еншілеп, ел көлеміндегі білгірлер сайысына жолдама алған. Мұнда шәкірт қыз қазақ тілі мен әдебиеті пәні бойынша берілген тапсырмаларды орындауда.
Сабина Тастемір – Әбу Досмұхамбетов атындағы облыстық дарында балаларға мамандандырылған гимназия-интернатының оқушысы:
– Бұл олимпиадаға қатысуымның басты себебі – өзімді шыңдау және де осындай жетістіктерге жетіп, үлгілі оқушы болу. 0,38 Бірінші облыстық кезең 2 турдан тұрды. 1-ші тур – эссе, 2-шісі жазба құралдарынан құралды. Облыстық турда мен екінші орын иегері атандым.
Білім додасы 16 жалпы білім беретін пәндер бойынша өтуде. Республикалық сайыста облыстық кезеңнен сүрінбей өткен 70-тен астам солтүтікқазақтандық бақ сынап жатыр.
Роза Сәркен – СҚО білім беру саласындағы әдістемелік жұмыс және ақпараттық технологиялар орталығының директоры:
– Олимпиада Ю-стади облыстық тестілеу орталығында өтеді. Біздің облыстан 73 оқушы қатысады. Олимпиада тапсырмаларын, оқушылардың жұмыстарын, дұрыс жауаптарды және нәтижелерді «Дарын» республикалық ғылыми-практикалық орталығының интернет-ресурсынан көруге болады.
Сонымен қатар, биыл алғаш рет өзін-өзі тану пәні бойынша да олимпиада өтіп жатыр. Балалар тапсырмаларды компьютер мен интернетті пайдалана отырып “Дарын” республикалық ғылыми-практикалық орталығының сайтынан жүктейді. Байқау соңында жеңімпаздар алғыс хаттармен марапатталады.
Маржан Касымбек