Ол «Audi» автокөлігімен Ресейге қонаққа кетіп бара жатыпты. Мамандар тоқтатып, құжаттарын тексерген. Сол сәтте ер адамға іздеу салынғаны анықталған. Солтүстікқазақстандық тұрғын Челябі облысында болған жол-көлік оқиғасына қатысы бар деген күдікке ілініп отыр. Апат салдарынан 1 кісі ауыр зардап шеккен. Қызылжар ауданының криминалдық полиция қызметкерлері ұсталғаннан жауап алған. Және іздеу жариялаған ресейлік мамандарға хабар берген.
Ерлан Мәдиев – СҚО ПД патрульдік полиция батальонының командирі:
– Жыл басынан батальон қызметкерлері бағдар парақтары бойынша – 15 тұлғаны, сондай-ақ, халықаралық іздеуде жүрген 1 адамды ұстады. 39 жүргізуші масаң күйде құрықталды. Бұдан бөлек, 3 айдың ішінде патрульдік полицейлер 2 қылмысты ашуға қатысып, рұқсат құжаттарынсыз тыйым салынған заттарды және тауарларды заңсыз тасымалдаудың 58 фактісін анықтады. Оның ішіндегі 13-і – ет өнімдерін және тағы соншасы мал тасымалдауға қатысты.
Эльмира Садвокасова