Қалалық қоғамдық кеңесінің кезекті отырысы өтті

МТРА жаңалықтары

21:09 30 Наурыз 2021

Жыл басынан бері қалада 47 өрт оқиғасы орын алған. Бұл алдыңғы жылдармен салыстырғанда 2 есе көп. Петропавлда тіркелген төтенше жағдайлардың салдарынан 18 адам жарақат алып, 6 кісі қаза тапқан. Ал материалдық шығын көлемі 12 млн теңгені құрап отыр. Құтқарушылардың сөзінше, оттың бас көтеруіне басты себеп – адамдардың немқұрайлылығы. Кей жағдайда ағайын пешке, электржылытқыш құрылғыларға, газды қолдануға жауапсыздықпен қарайды.

Әсет Шайкин – қалалық төтенше жағдайлар басқармасының бас маманы:

– Өрт оқиғаларының дені жеке секторларда орын алады. Сондықтан, біз апта сайын жер үйде тұратын тұрғындармен профилактикалық жұмыс жүргізіп отырамыз. Тағы, қала әкімінің бастамасымен қоғамдық тамақтану орындарындағы қауіпсіздік талаптарының сақталуын бақылайтын арнайы мониторингілік топ құрылды. Қазір олар негізінен көпқабатты үйлердің бірінші қабатында орналасқан мекемелерге бақылау жүргізуде.

Бір қызығы, аталған мониторингілік топтың құрамында құтқарушылардың өздері жоқ. Заң бойынша аталған мамандарға шағын және орта бизнес объектілерін тексеруге болмайды. Сондықтан, Төтенше жағдайлар басқармасының өкілдері арнайы емес, жоспарлы тексеріспен және профилактикалық жұмыспен ғана шектелуге мәжбүр. Бұл мәселені қоғамдық кеңес мүшелері бақылауларына алды. Отырыста тағы 19-шы ықшам ауданда орналасқан “барақ үйдің” бір пәтерін сүру жайы да қарастырылды.

Марат Ерханов – қалалық қаржы бөлімінің басшысы:

– Ақпан айының соңында 4ші линия көшесіндегі 24-ші үйдің тұрғыны бізге жүгініп, көрші пәтерде 6-7 жылдан бері ешкімнің тұрмайтындығын мәлім етті. Қазір бұл баспана қалалық әкімдікте иесіз жылжымайтын мүлік ретінде есепте тұр. Пәтер қалалық әкімдікке тиесілі болуы мүмкін. Нақты шешім бір жылдың ішінде жергілікті сотта қарастырылып, қабылданатын болады.

Кейін жиын барысында қалалық бюджетті нақтылау жобасы қарастырылды.

Жанна Бисенова

Бұдан әрі оқыңыз

Ақмола облысынан судың алғашқы толқыны келе жатыр
Көпті толғандырған жер мәселесінің нүктесі қойылды
Ұлы Жеңістің 76 жылдық мерейтойына арналған челлендж
Әскери-техникалық мектеп сарбаздары ант қабылдады
МӘМС жүйесі аясында онкоскрининг қызметі тегін көрсетіледі
Биылдан бастап 500 қазақстандық ғалым шетелде тағылымдамадан өтеді
“АЙНА-КӨЗ” орталығына – 22 жыл
10 млн теңге жымқырған бас есепшіге қатысты сот үкімі шықты
Парақорлар квазимемлекеттік мекемелерде де қызмет ете алмайды
Мас күйде көлік жүргізген петропавлдық ұсталды
Қазақстандықтар мамырда 13 күн демалады
Тәртіп сақшысы пара алды деген күдікке ілінді