Жылдам әрі епті жеткіншектердің сайысы. Өткен сенбі күні облыс орталығында жергілікті жас хоккейшілер арасында жолдастық ойындар өтті. Ел Тәуелсіздігінің 30 жылдығына орай ұйымдастырылған шараға 4 команда қатысты.
10 жасар Ерасыл Сәруар – “Құлагер” хоккей құрамасының ойыншысы. Жеткіншек спорттың бұл түріне 3 жыл бұрын ден қойыпты. Жас спортшының арманы асқақ. Болашақта атақты хоккейші болып, ел намысын халықаралық аренада қорғағысы келеді.
Ерасыл Сәруар – Қ.Байболов атындағы облыстық мамандандырылған БЖСМ тәрбиеленушісі:
– Бір рет хоккейді көруге бардым, маған қатты ұнады. Сол кезде әкем үйірмеге жазылуға ұсыныс тастады. Қуанышымда шек болған жоқ. Хоккей – қатал спорт, маған сонысымен ұнайды.
Ерасыл қатарластарымен бірге жолдастық кездесуде өнер көрсетіп жатыр. Ойыншылар бір-біріне лайықты қарсылық танытуда.
Елена Хасенова – Қ.Байболов атындағы облыстық мамандандырылған БЖСМ басшысының орынбасары:
– Жолдастық кездесу 2 жерде өтіп жатыр. “Қарасай” стадионы маңындағы хоккей кортында 2010-2011 жылғы балалар өнер көрсетуде. Ал А.Винокуров спорт сарайында 2008-2009 жылғы жастар ойнап жатыр. Соңында қатысушылар дипломдармен марапатталатын болады.
Жалпы, балалардың барлығы Қ.Байболов атындағы облыстық мамандандырылған балалар мен жасөспірімдер спорт мектебінде шынығады. Бүгінде мұнда 150-ге жуық жеткіншек хоккеймен айналысады. Жас спортшыларға 4 тәжірибелі маман бапкерлік етеді. Солардың бірі – Рафаил Сингатулин.
Рафаил Сингатулин – Қ.Байболов атындағы облыстық мамандандырылған БЖСМ жаттықтырушысы:
– Біз аптасына 5-6 рет жаттығамыз. Әр жаттығу жиыны 1,5-2 сағатқа созылады. Балалар мұзға шықпас бұрын жарты сағаттай денелерін қыздырып, жаттығулар жасайды. Кейін корт үстінде шынығады.
Рафаил Сингатулин шәкірттерінің хоккейге деген ықыласын жоғары бағалап отыр. Болашақта әрқайсысы чемпион болатынына сенімді.
– Хоккей шапшаңдылықты талап етеді. Тез қимылдап, тез әрекет жасауға үйренесің.
– Маған үнемі қозғалыста болған ұнайды. Шайба соққанда кеудеңді қуаныш кернейді.
Негізі, жас құлагерліктер наурыз айында елордада өтетін дүбірлі додаға дайындықтарын пысықтап жатыр. Кейін ел біріншілігіне қатысуды жоспарлап отыр.
Жанна Бисенова