Аққайың ауданында жаңа сүт-тауарлы ферма жұмыс істеп тұр

Аптадағы маңызды жаңалықтар

21:14 19 Ақпан 2021

Өткен жылы облысымызда 600 мың тоннаға жуық сүт өндірілген. Аймақ басшысы Құмар Ақсақалов келешекте бұл көрсеткішті 1 млн тоннаға жеткізу керектігін айтқан болатын. Бұл ретте өлкеде ауқымды шаруа жүргізілуде. Соңғы 3 жылда 12 бірдей сүт фермасы іске қосылды. Биыл тағы 10 кешен салу көзделіп отыр. Өлкедегі заманауи агроқұрылымдардың бірі Аққайың ауданында орналасқан.

Бұл – Аққайың ауданына қарасты Ленинское ауылында небәрі 3 ай бұрын бой көтерген су жаңа сүт-тауарлы ферма. «Иван Зенченко» серіктестігіне тиесілі кәсіпорын 1600 басқа шақталған. Заманауи кешен соңғы үлгідегі қондырғылармен қамтамасыз етілген. Тиісінше, мұндағы шаруаның барлығы автоматты түрде атқарылады.

Сергей Лысенко – «Иван Зенченко» ЖШС кешен меңгерушісі, Аққайың ауданы:

 – Кешендегі заман игіліктерінің барлығы – германиялық өнімдер. Бүгінде фермада 40-қа жуық адам еңбек етеді. Оның 10-ы сиырларды күтумен айналысады. 5 адам техниканы тізігіндесе, тағы 5-уі сауыншылық қызмет атқарады. Соңғылары күніне 100-ден астам сиыр сауады. Кадр тапшылығы жоқ.

Жалпы, кешен 6 корпустан тұрады. Біреуінде Зеңгі баба төлін саууға арналған арнайы қондырғы орналасқан. Мұнда мамандар тұяқтыларды күніне 2-3 реттен сауады. Ал қалған нысандар ірі қараны күтіп-ұстауға арналған. Олардың біреуіне 1200 бас бұзау мен 4-уіне 400 бас сиыр сыяды.

Жанна Бисенова – тілші:

– Мына сиырлар өткен жылдың жазында сонау Германиядан әкелінді. Мамандар симментал тұқымды тұяқтыларды күніне 2 рет азықтандырады. Бір-біреуі тәулігіне 30 литр ақ береді екен.

Мамандар сиырлардың дәл осы тұқымын бекерден-бекер таңдамаған. Симментал сиыры – әлемде ең кең таралған ірі қара мал. Ерекшелігі сол, сүтті өзгелеріне қарағанда 10 литрге молырақ береді әрі түрлі жем-шөпке, климатқа оңай бейімделеді екен.

Сергей Лысенко – «Иван Зенченко» ЖШС кешен меңгерушісі, Аққайың ауданы:

– Бүгінде фермада 1200 бас симментал сиыры мен 500 бұзау бар. Жазға қарай тағы 400 бас алуды жоспарлап отырмыз. Бұл сиырлардың әрқайсысы жылына орташа есеппен 5 мың литрге дейін ақ береді. Сауылған сүт алдымен салқындатылады, сосын барып қаладағы зауыттарға жіберіледі.

Өткен жылы аймаққа жалпы 2800 бас симментал сиыры әкелініпті. Биыл тағы 4 мыңын алу жоспарлануда. Айта кетейік, бүгінде өңірімізде сүт өндірісімен 90-нан астам кәсіпорын айналысады. Оның 21-і – заманауи кешен. Ауқымды шаруа биыл да жалғасын таппақ. 2021-де облыста тағы жаңа фермалар салу көзделіп отыр.

Талғат Наурызбаев – СҚО ауыл шаруашылығы басқармасы басшысының орынбасары:

–  Былтыр өңірде 11 сүт кешенінің құрылысы жоспарланған болатын. 3300 басқа шақталған 5 бірдей кешен қолданысқа тапсырылды. Олар Аққайың, Қызылжар, М.Жұмабаев, Уәлиханов және Айыртау аудандарында орналасқан. Биыл біз облыс бойынша 5 мың басқа шақталған тағы 10 сүт кешенін салуды жоспарлап отырмыз.

Шағын статистика: әр қазақстандық жылына 340 литр сүт ішеді екен. Өткен жылы біздің облыста 600 мың тоннаға жуық сүт өндірілген. Яғни, теріскей өңірі 2 млн-ға жуық отандасымызды сүтпен қамтамасыз етеді деген сөз. Ал бұл – ел халқының 10 пайызы. Бұл жайлы аймақ басшысы Құмар Ақсақалов қаңтар айында өткізген есептік кездесуінде баян еткен болатын.

Құмар Ақсақалов – Солтүстік Қазақстан облысының әкімі:

– Аграрлы аймақтағы басты мақсаттардың бірі – сүт саласын дамыту. Соңғы 3 жылда өңірде 12 бірдей сүт фермасы іске қосылды. Биыл бірқатар кешеннің құрылысы бастау алмақ. Нәтижесінде сүт өндірісі өткен жылға қарағанда 51 мың тоннаға ұлғаяды. Келешекте бұл көрсеткішті 1 млн тоннаға дейін жеткізуіміз керек.

 

 

 

 

 

Бисенова Жанна

 

 

Бұдан әрі оқыңыз

Петропавлда майлы дақыл өңдейтін зауыттың құрылысы басталды
СҚУ-да қуғын-сүргін құрбандарын еске алу күніне арналған жиын өтті
Айыртау және Есіл аудандарының әкімдері қызметтерінен босатылды
Облыстық ҚХА-ның XXV сессиясы өтті
«QYZYLJAR art» орталығы ашылды
Туған қызын өлімші етіп сабаған әйелге қатысты алғашқы сот отырысы өтті
Березовка селосында мал бағатын жер жоқ
Облыстық әкімдіктің отырысы өтті
Онкологиялық орталыққа жаңа МРТ аппараты қойылды
Жазғы лагерьлердің дайындығы пысықталды
Петропавлда фармацевтикалық зауыт салынады
«Е-өтініш» ақпараттық жүйесі іске қосылады