Ел чемпионатында өнер көрсеткен зілтеміршілер Петропавлға оралды

Спорт

21:05 28 Желтоксан 2020

Кеше ел чемпионатында өнер көрсеткен зілтеміршілер Петропавлға оралды! Облыс құрамасы Қостанайда және Талдықорғанда өткен жарыста өңір намысын абыроймен қорғады. Қос жарыстан 4 спортшымыз түрлі санаттағы 12 бірдей медаль әкелді.

15 жасар зілтемірші Алина Колиушко үшін соңғы 3 ай оңайға соқпады. Жерлесіміз екі бірдей ел чемпионатына қатысып, үздіктер қатарынан көрінді. Алдымен жасөспірім Қостанайда өткен додада 2-ші орын иеленді. Кейін жас спортшы өңір намысын Талдықорған қаласында қорғады. Мұнда жеңіс тұғырының бірінші сатысына көтеріліп, халықаралық дәрежедегі спорт шебері нормативін орындады.

Алина Колиушко – ауыр атлетика бойынша ҚР спорт шебері:

– Талдықорғанда өткен жарысқа қалай да болсын 1-ші орын аламын деп бардым. Менің басты қарсыласым Алматы облысының 23 жасар спортшысы болды. Ол – ауыр атлетикадан әлем чемпионатының күміс жүлдегері. Сайыс кезінде мен жалпы есепте 168 келіні еңсердім. Нәтижесінде маған 1-ші орын бұйырды. Тәжірибелі зілтеміршіден асып түстім.

Жалпы, Талдықорғанда өткен ел чемпионатына 350-ге жуық спортшы қатысқан. Додада Алинадан бөлек, 3 солтүстікқазақстандық өнер көрсеткен екен.
Теріскейліктердің 3-еуі біріншіліктен жүлдемен оралып отыр. Қоржында 1 алтын мен 2 күміс медаль бар. “Бұның бәрі – күнделікті дайындық пен қатаң тәртіптің жемісі”,- дейді тәжірибелі жаттықтырушы Эрик Алибаев.

Эрик Алибаев – СҚО ауыр атлетика бойынша аға жаттықтырушысы:

– Талдықорғанда онлайн форматта өткен ел чемпионатына бірнеше ай бойы дайындалдық. Дайындалуымыздың себебі жарысқа мықты спортшылар қатысты. Араларында, тіпті, 30-40 жастағы тісқаққандар болды. Бірақ, олардың біразын қапы қалдырдық. Мәселен, Алина Колиушко – 1-ші, Александр Шпехт пен Жанәли Тұяқов 2-ші орын еншіледі. Ал Денис Полубояринов 4-ші орынды қанағат тұтты. Балалардың барлығына дән ризамын.

2020-шы жыл жерлес зілтеміршілер үшін жемісті болды деп айтуға болады. Биыл Алина Колиушко мен Жанәли Тұяқов Қазақстан ұлттық құрамасына мүше атанды. Одан бөлек, Жанәли алғаш рет жаһандық додаға қатысып, 3-ші орынды иеленді. Келесі жылдың жазында жерлестеріміз Ташкент қаласында өтетін әлем чемпионатына қатысуды жоспарлап отыр.

 

 

Бисенова Жанна

 

Бұдан әрі оқыңыз

“Qulager” ХК көкшетаулық ұжымға есе жіберді
Футболдан ел біріншілігі наурыздың 13-і күні басталады
Қызылжарлық футболшылар жеңіске жетті
Петропавлда жаңа спорт клубы ашылды
Жерлес маунтинбайкші ел біріншілігінде топ жарды
Теріскейлік боксшы ел біріншілігінде қола медаль еншіледі
Дубайдан жүлдемен оралды
Жас хоккейшілер арасында жолдастық кездесу өтті
Қазақ күресі мектеп бағдарламасына енгізіледі
“Қуаныш” ВК ел чемпионатының 3-ші кезеңінде 3-ші орынға тұрақтады
Жергілікті “Qyzyljar” ФК кезекті кездесуде ойсырай ұтылды
Өңір аударыспақшыларының өнері