Петропавлда жоғалған көлік Шал ақын ауданынан шықты. Жуырда қала тұрғыны полицейлерге ВАЗ маркалы автомобилінің жоғалғаны жайлы хабар берген. Тәртіп сақшылары ұрланған темір тұлпарды бір күннің ішінде “Жезқазған-Петропавл” трассасынан тапқан.
Дүйсенбіден сейсенбіге қараған түні петропавлдық полицейлерге қызыл түсті “ВАЗ-2115” маркалы көліктің жоғалғандығы жайлы хабар түседі. Машина соңғы рет Володарский көшесінің бойындағы аулалардың бірінде тұрыпты. Сөйтіп, жедел ақпар жан-жаққа тарайды. Нәтижесінде таңғы 8 жарымдар шамасында темір тұлпар табылады. Мүлік Сергеевка қаласының маңындағы “Жезқазған-Петропавл” трассасынан бірақ шығады. Сонда шаһар сыртындағы бекеттен қалай өткен? Бұл дерек қазір анықталып жатыр.
Манарбек Молдабеков – СҚО ПД патрульдік полиция батальоны командирінің орынбасары:
– Оқиға орнына Шал ақын ауданы полиция бөлімінің жедел-тергеу тобы шақырылды. Жүргізуші мен автокөлік аудандық полиция бөліміне жеткізілді.
Жүргізуші – 22 жастағы петропавлдық. Сөзінше, темір тұлпармен жұмысқа бара жатқан. Көлікті де 1 айдан бері тізгіндеп жүр екен. Күрмеуі күрделі мәселе алдағы уақытта шешімін таппақ. Қазір бұл фактіге қатысты ҚР ҚК 188-бабы 1-бөлігі бойынша сотқа дейінгі тергеп-тексеру амалдары жүргізіліп жатыр.
Бисенова Жанна