Естімеген елде көп. Солтүстікқазақстандық ұрлық жасау үшін кран жалдаған.
Тәртіп сақшыларына гаражын ұрлап кеткен қала тұрғыны жүгінеді. Куәгерлердің сөзінше баукеспе арам ойын түс ауған уақытта іске асырған. Ол ұзындығы 6 метр болатын гаражды кранмен көтеріп алып кеткен. Әрекетінің шынайылығы сол, тіпті, тұрғындардың күдігін тудырмапты. Олар мүлік сатылып жатыр деп ойласа керек. Жедел-іздестіру шарасының нәтижесінде баукеспе қолға түсті. Бұрын сотты болған 87-ші жылғы қала тұрғыны гаражды түрлі түсті металл қабылдайтын жерге 130 мың теңгеге сатып жіберген екен.
Әділет Жеңісов – қалалық ПБ бірінші полиция бөлімінің жедел уәкілі:
– Аталған факті бойынша ҚР ҚК 188-бабы 1-бөлімі бойынша қылмыстық іс қозғалды. Қазіргі күні тергеу амалдары жүргізіліп жатыр.
Бердимурат Баймухан